Foto: semeytany.kz
Elordada ótken jıynǵa Qusbegilik federasııasynyń prezıdenti Berik Ýálı, vıse-prezıdentter – Janjigit Omarhan men Baǵdat Múptekeqyzy, sondaı-aq atqarýshy dırektor Bazarbek Kúntýǵan jáne qusbegi sportshylar qatysty.
Kún tártibindegi basty másele – 8-13 qyrkúıek aralyǵynda Astanada ótetin 5-shi Dúnıejúzilik kóshpeliler oıyndarynda qusbegilik saıysy boıynsha baq synaıtyn ulttyq quramanyń daıyndyǵy. Baıraqty básekede Qazaqstannyń namysyn qusbegilikten toǵyz sportshy qorǵaıdy. Olar: búrkit qusy boıynsha – Serikbek Kýntýgan, Erzat Baıkadamov, Arman Kýshkarov, qarshyǵa qusy boıynsha – Dáýren Arshabaı, Baǵdat Keýenov, Qudaıbergen Raýıluly jáne ıtelgi qusy boıynsha – Erlan Kenjetaev, Baqdáýlet Babajan, Ibragım Bazarbaev.
Jyl basynan beri ulttyq qurama sapyndaǵy qusbegiler úshin Almaty qalasy men Aqmola oblysynda eki oqý-jattyǵý jıyny ótken edi. Úshinishi oqý-jattyǵý jıyny Astana qalasynda 27 tamyzdan 7 qyrkúıekke deıin jalǵasady. Qazaq sportshylarynyń Kóshpeliler oıyndaryna daıyndyǵy federasııa prezıdentiniń jeke baqylaýyna alynǵan.
«Elimizdiń tórinde tórtkúl dúnıe kóz tikken úlken is-shara ótkeli jatyr. Osy dúbirli dodada el týyn senip tapsyrǵan sportshylarymyzǵa federasııa atynan sáttilik tileımin. Shapqan attyń tuıaǵy, ushqan qustyń qanaty talatyn ulan-ǵaıyr dalanyń ıesin, qyran baptap, qus salǵan begzada ónerdiń kıesin tanytatyn sátte aıanyp qalmaıyq. Memleket basshymyz ben búkil el bizge senim artyp otyr», dedi Qusbegilik federasııasynyń prezıdenti.
Sonymen qatar Berik Ýálıdiń tóraǵalyǵymen ótken jıynda medaldik mindettemeler men qosymsha syıaqy mólsheri jarııalandy.
Belgili bolǵandaı, V Dúnıejúzilik kóshpeliler oıyndary dıreksııasynyń atynan jeke sport túrlerinde jeńimpazdar – birinshi oryn úshin 500 myń teńge, ekinshi oryn ıelengender – 300 myń teńge, qola júldeger – 200 myń teńgeden alady. Budan bólek, dúbirli dodada qusbegilikten Qazaqstan qorjynyna medal salǵan ulttyq qurama múshelerine federasııa prezıdentiniń atynan arnaıy syıaqy beriletini aıtyldy. Iаǵnı, birinshi oryn úshin – 1 000 000 teńge, 2-orynǵa – 500 000 teńge, 3-orynǵa – 300 000 teńge tigilip otyr.
Aıta keteıik, qusbegilikten jarys qyrkúıektiń 12-13 kúnderi Astananyń etnoaýyl aýmaǵynda ótedi.
