Psıhologııalyq-pedagogıkalyq qoldaý kabıneti – arnaıy bilim berý uıymy. Onda kez kelgen erekshe bala men onyń otbasy defektolog, psıholog, logoped, tıflopedagog, sýrdopedagog, fızıoterapevt, ózge de bilikti mamandardyń kómegin ala alady. Negizgi maqsat – erekshe bala ósirip otyrǵan otbasylarǵa jaqyn jerden túzeý kabınetterin qurý. Pavlodar oblystyq psıhologııalyq-pedagogıkalyq qoldaý qyzmetiniń qurylymyna 13 kabınet kiredi. Endi olardyń birinde erte qoldaý qyzmeti jumys isteı bastady.
Atap óterligi, bul qyzmet «Dara» qorynyń bastamasymen, «Shevron» kompanııasynyń demeýshiligimen ashylyp otyr. Mundaı ortalyq elimiz boıynsha úshinshi bolyp Pavlodar qalasynda qurylǵan.
«Dara» qory ókilderiniń aıtýynsha, balalardyń boıyndaǵy aýytqýshylyq táýekelderiniń qalyptasýyn tómendetýge baǵyttalǵan jumystar – elimizdegi jańa baǵyt. Qanatqaqty joba bıylǵy kóktemde iske qosylyp, buǵan deıin elimizdiń eki aımaǵynda erte qoldaý qyzmetteri jumysyn bastap ketken edi. Alǵashqysy О́skemende, ekinshisi Atyraýda, endi, mine, Pavlodarda ashylyp otyr. Sondaı-aq tórtinshisi Ekibastuz qalasynda da óz qyzmetin usyna bastady.
Buǵan deıin psıhologııalyq-pedagogıkalyq qoldaý kabınetine jóndeý júrgizilip, qajetti jabdyqtar men oıynshyqtar, balalarmen jumys isteýge arnalǵan materıaldar satyp alynǵan. Al jergilikti psıhologter qosymsha oqytylǵan.
– Balanyń týǵan sátinen úsh jasyna deıingi shaǵy – eń mańyzdy kezeń. Bul ýaqytta onyń boıynda qorshaǵan ortamen ózara yntymaqtasýdyń barlyq qajetti mashyqtary qalyptasa bastaıdy. Bul degenimiz – sóıleý, júrý, eresekterdi túsiný, ózge de mashyqtar. Bular arqyly bala ózin qorshaǵan álemdi tanyp, adamdarmen aralasa bastaıdy. Eger osy kezeńdegi damý úrdisinde ata-anasy balanyń boıynan qandaı da bir aýytqýshylyqty baıqasa, dárigerge nemese bizdiń erte qoldaý qyzmetine habarlasa alady, – deıdi Pavlodar aýdandyq psıhologııalyq-pedagogıkalyq túzetý kabınetiniń basshysy Aıjan Ospanova.
Mamandardyń sózine súıensek, balalardyń damýyndaǵy aýytqýshylyqtar sál ǵana baıqalýy múmkin. Ortalyqtaǵy arnaıy oqytylǵan mamandar jaǵdaıdy taldap, ata-anaǵa tıisti nusqaýlyqtar bere alady. Bala damýyndaǵy aýytqýshylyqtyń aldyn alǵysy keletin ata-ana ondaı nusqaýlyqty úıde de oryndaı alady eken. Eger jaǵdaı alańdatarlyqtaı bolsa, máselen, bala eresekterdiń oǵan qarata aıtylǵan sózderin anyq túsinbese, ata-anasy ony birden erte qoldaý qyzmetiniń terapııasyna aparǵany abzal. Munda onymen qajetinshe defektolog, psıholog, logoped nemese emdik dene tárbıesi mamany shuǵyldanady.
Ortalyqqa psıhologııalyq-medısınalyq-pedagogıkalyq keńesten ótken balalar da kele alady. Ol úshin dárigerdiń joldamasy bolsa jetkilikti.
– Bizdiń erte qoldaý qyzmetiniń is-áreketi balaly otbasylarǵa baǵyttalǵan. Munda eńbek etetin qyzmetkerler balamen jumys istep qana qoımaı, ata-anasyna mańyzdy keńes beredi. Sol arqyly bala boıynda týyndaýy múmkin aýytqýshylyqtyń qalaı aldyn alýǵa bolatynyn úıretedi. Nátıjesinde, sábıdiń damýyna teris áser etken shekteýler birtindep joıylyp, balany ortaǵa beıimdeýge jáne ári qaraı mektepaldy bilim berý uıymdaryna daıyndaýǵa ata-anasyna kómektesedi. Iаǵnı ortalyqtaǵy mamandar balalardyń mashyqtaryn qalyptastyrýǵa jumyldyrylady. Jetkinshek ózge qatarlastaryna qaraǵanda motorıkalyq mashyqtardy tym baıaý baǵyndyrsa, sóıleý tiliniń damýy kesheýildese, únemi agressııa tanytyp, jylaýdy údetse, uıqysy nashar bolyp, tábeti joǵala bastasa, bizdiń ortalyqqa ákelgeni durys. Nemese ata-analary áldenege alańdap, balasynyń damýyndaǵy erekshelikterdi tanyp bilgisi kelse de ortalyqqa júgine alady, – deıdi «Damý» qorynyń menedjeri Aıgúl Tabergenova.
Zańǵar aýylynyń turǵyny Samal Toqtaǵulova – erte qoldaý qyzmetine alǵashqy bolyp kelgenderdiń biri. Úsh jasar uly Batyrhan gıperbelsendi bolýyna, sóıleý tilinde másele týyndaýyna baılanysty nevropatolog mamannyń keńesimen osynda jiberilipti.
– Biz bul ortalyqqa eki aıdan asa ýaqyt kelip júrmiz. Nátıjesi jaqsy. Sebebi balamyz gıperbelsendi, bir orynda baıyz taýyp otyra almaıdy jáne sóıleýinde kidiris bar. Sondyqtan osynda keldik. Qazir aıtqanymyzdy tyńdaıdy, sózimizdi qaıtalaıdy. Balalarmen oınap, qarym-qatynas qura bastady. Ortalyqqa kelgenimizge qýanyshtymyz. Munda psıhologpen, defektologpen jumys istedik. Naqty ózgeris baıqalyp jatyr, – deıdi ana.
Mekemede balalarǵa barlyq qolaıly jaǵdaı qarastyrylǵan. Pandýs pen túrli-tústi dybys bergishter, ustaǵysh tutqalar bar, kireberis esigi keń. Ǵımarat zamanǵa saı arnaıy jabdyqtarmen, ádistemelik materıaldarmen, ádebıettermen qamtylyp, Montesorrı kabıneti, emdik dene tárbıesi zaly jabdyqtalǵan.
«Dara» qorynyń ókilderi keleshekte mundaı qyzmet kórsetý ortalyqtaryn elimizdiń barlyq óńirinde ashýdy josparlap otyr.
Pavlodar oblysy
