Toqaev jylý-energetıkalyq ortalyqtar men tutynýshylardy kómirdiń ornyna gaz jaǵýǵa kóshirý jumystaryn baıyppen júrgizý qajettigin atap ótti. Osyǵan baılanysty Úkimetke gaz óńdeý zaýyttarynyń qurylysyn jedeldetýdi tapsyrdy.
«Úkimetke Jańaózendegi, Qashaǵandaǵy jáne Qarashyǵanaqtaǵy gaz óńdeý kásiporyndarynyń qurylysyn tezdetýdi tapsyramyn. Bul – basty mindet», dedi Prezıdent Q.Toqaev.
Ol sonymen qatar Ortalyq Azııa – Ortalyq gaz qubyrynyń 800 shaqyrymnan astamyn jańǵyrtý jumystary qysqa merzimde aıaqtalǵanyn atap ótti.
AES-ke qatysty referendým ótedi
Qazaqstan Prezıdenti Qasym-Jomart Toqaev halyqqa arnaǵan Joldaýynda 6 qazan kúni elde atom elektr stansasyn salý máselesine qatysty halyqtyń sheshimin naqtylaıtyn referendým ótetinin aıtty.
Prezıdent Q.Toqaev álemdik energııa tapshylyǵyna nazar aýdara otyryp, jańartylatyn jáne ekologııalyq taza energııa kózderi qajet ekenin atap ótti.
«Biz atom energetıkasyn damytýǵa basa mán berýimiz kerek dep oılaımyn. Sebebi ekonomıkamyz kún ótken saıyn mol energııany qajet etip otyr. Mundaı suranysty atom energetıkasy qamtamasyz ete alady. Qazir damyǵan jáne damýshy 30 memlekette 200-ge jýyq atom elektr stansasy jumys istep tur.
Biz elimizdiń ózine tán ereksheligin jáne uzaq merzimge arnalǵan ulttyq múddelerimizdi eskere otyryp, tek alǵa qaraı júrýimiz qajet. Bir sózben aıtsaq, bolashaqty oılaýymyz kerek. Sondyqtan men atom elektr stansasyn salýǵa qatysty barynsha baıypty sheshim qabyldaý qajettigin udaıy aıtyp kelemin», degen Q.Toqaev mundaı strategııalyq jospardy qoǵamda keńinen talqylaý qajet ekenin alǵa tartty.
Tilge baılanysty qysym joq
«Qazaqstanda tiline, dinine, ultyna, áleýmettik jaǵdaıyna jáne basqa da sebepterge baılanysty eshkimge eshqandaı qysym jasalmaıdy, jasalýy da múmkin emes», dedi Memleket basshysy Qasym-Jomart Toqaev jyl saıynǵy halyqqa arnaǵan Joldaýynda.
Prezıdenttiń aıtýynsha, mundaı jaıttar ara-tura kezdesedi. Biraq kóbine jekelegen adamdardyń saýatsyzdyǵy men jaýapsyzdyǵynan bolyp jatady. Toqaev mundaı oqıǵalardyń jolyn quqyq qorǵaý organdary árdaıym zań arqyly kesip otyratynyn jetkizdi.
«Buǵan qosa bizge belgili keıbir teris pıǵyldy adamdar, onyń ishinde shetelde júrgender de bar, máseleni ýshyqtyrý arqyly qoǵamdyq pikirge yqpal etkisi keledi, elimizge orynsyz shúıligedi. Qazaqstannyń qoǵamynda da, bıliginde de eshqandaı «fobııa» buǵan deıin bolǵan emes, qazir de joq, bolashaqta da bolmaıdy. Sondyqtan aqsha úshin el ishine iritki salýdy kózdeıtin mundaı jymysqy áreketterden túk shyqpaıtyny anyq», dedi Qasym-Jomart Toqaev.
«Úkimet pen Bas prokýratýra birlese jumys isteýge tıis»
Qazaqstannyń aldaǵy kezeńdegi saıası jáne áleýmettik-ekonomıkalyq damý bolashaǵyna arnalǵan bıylǵy Joldaýynda Qasym-Jomart Toqaev aktıvterdi memleketke qaıtarýǵa qatysty pikir bildirdi.
Iаǵnı «Tıisti reestrge engizilgen kásipkerlermen kelisim jasaǵan kezde memleketke qaıtarylatyn aktıvterdi «zańsyz» dep tanymaý týraly normany bekitýge bolady. Bul – shyn máninde, iri kásip ıeleriniń múddesine saı keletin mańyzdy qadam», degen Qazaqstan Prezıdenti kásipkerler qarjyny respýblıkalyq bıýdjetke aýdarý máselesine kelgende Úkimetpen, Bas prokýratýramen tyǵyz baılanysta jumys isteýge tıis ekenin eskertip, ár teńge úshin saýdalaspaı, qajetti sharanyń bárin óz erkimen jasaýǵa shaqyrdy. Sondaı-aq Memleket basshysy quzyrly organdarǵa zańsyz maınıngpen aınalysatyndarmen kúresýdi tapsyrdy.
«Sıfrlyq aktıvter men maınıngti zańmen rettep, krıptobırjalardy odan ári damytý isin jalǵastyrǵan jón. Elimizde ekonomıkaǵa qajetti elektr qýatyn óz keregine shamadan tys paıdalanatyn, sóıte tura salyqty az tóleıtin kásipkerler bar. Mine, osyndaılardy jónge salý kerek», dedi Q.Toqaev.
«Sıfrlyq Jibek joly» jobasynyń bir bóligi
Toqaev Kaspıı teńizi arqyly talshyqty-optıkalyq baılanys jelisin tartý jobasynyń 2025 jyly aıaqtalatynyn málimdedi.
«Elimiz úshin bul jobanyń mańyzy zor. Sol arqyly málimetterdiń halyqaralyq arnasymen jáne transshekaralyq aǵynymen baılanysty sıfrlyq ınfraqurylym qura alamyz», dedi Qazaqstan Prezıdenti halyqqa arnaǵan Joldaýynda.
Jalpy, Q.Toqaev telekommýnıkasııa jelileri men data-ortalyqtaryn barynsha jetildirýge, kıber-qaýipsizdiktiń álemdik standarttaryn engizýge jáne mamandardyń biliktiligin arttyrýǵa qatysty jumysty jalǵastyrý kerektigin basa aıtty. Sondaı-aq ol áýe habtaryn damytý – óte mańyzdy mindet ekenin de atap ótti. Qazaqstannyń áýe keńistigi arqyly jyl saıyn 150 myń tonnaǵa jýyq júk tasymaldanady.
