Ortalyqtyń ashylýy 2024 jylǵy 17 qyrkúıekte Qazaqstan men Germanııa arasyndaǵy ǵylymı baılanystardy nyǵaıtýdaǵy mańyzdy kezeń - Federaldyq kansler Olaf Sholstiń Qazaqstanǵa memlekettik sapary aıasynda josparlanǵan bolatyn.
«Ideıadan áreketke» Qazaqstan-Nemis ǵylymı-zertteý yntymaqtastyq ortalyǵynyń tusaýkeseri aıasynda dóńgelek ústel ótti. Alqaly jıyndy Ulttyq ǵylym akademııasy prezıdenti, professor Aqylbek Kúrishbaev ashyp, ortalyqty qurýdyń eki el arasyndaǵy ǵylymı yntymaqtastyqty nyǵaıtýdaǵy mańyzdylyǵyn atap ótti. Professor Aqylbek Qajyǵululy ortalyqtyń birlesken ǵylymı zertteýlerdi damytý men ozyq tájirıbemen almasýdaǵy mańyzdylyǵyna toqtaldy.
Qazaqstan-Nemis ýnıversıtetiniń prezıdenti, professor, doktor Volrad Rommel jańa ortalyqtyń negizgi maqsattary men mindetterin tanystyryp, kadr daıarlaý jáne birlesken ǵylymı jobalardy qoldaý salasyndaǵy rólin atap ótti. UǴA vıse-prezıdenti, professor Lıazzat Eralıeva óz sózinde ortalyqtyń tek ǵylymı ıntegrasııaǵa ǵana emes, sonymen qatar Qazaqstan men Germanııa arasyndaǵy mádenı almasýǵa da yqpal etetinin aıtty.
Is-sharada Germanııanyń akademııalyq almasý qyzmetiniń (DAAD) Bas hatshysy, doktor Kaı Zıks pen Qazaqstandaǵy Germanııa Federatıvtik Respýblıkasynyń Elshisi Monıka Iversen jańa ortalyq aıasynda yntymaqtastyqty qoldaýǵa jáne damytýǵa daıyn ekendikterin bildirdi. Sonymen qatar, Germanııa Federatıvtik Respýblıkasynyń Almatydaǵy Bas konsýly Matıas Kısler jáne Konrad Adenaýer qorynyń Qazaqstandaǵy ókildiginiń basshysy Iohannes D. Reı sóz sóılep, ǵylymı jobalardy odan ári damytýdaǵy kózqarastaryn bildirip, ǵylymda joǵary nátıjelerge qol jetkizý úshin halyqaralyq yntymaqtastyqty damytý túsýdiń mańyzdylyǵyn atap ótti.
Dóńgelek ústelge fızıka-matematıka ǵylymdarynyń doktory, professor Asqar Jumadildaev, Sh. Esenov atyndaǵy Kaspıı tehnologııalar jáne ınjınırıng ýnıversıtetiniń prezıdenti Berik Ahmetov, D. Serikbaev atyndaǵy Shyǵys Qazaqstan tehnıkalyq ýnıversıtetiniń rektory Saýle Rahmetýllına, DKU halyqaralyq jáne aımaqtyq yntymaqtastyq ǵylymı-zertteý ınstıtýtynyń dırektory Bolat Sultanov, Qazaqstan ulttyq agrarlyq zertteý ýnıversıtetiniń basqarma tóraǵasy-rektordyń birinshi orynbasary Pirimqul Ibragımov qatysyp, eki jaqty ǵylymı yntymaqtastyqqa qoldaý bildirdi.
«Ǵylym Ordasy» ǵımaratynyń ekinshi qabatynda ornalasqan ortalyqta ekologııa, agrobıologııa, ómir jáne densaýlyq týraly ǵylymdar, sondaı-aq bilim berý men azamattyq qoǵam salasyndaǵy zertteýler damıtyn bolady. Jas ǵalymdardy qoldaý kórsete otyryp, ozyq tájirıbemen almasý, sondaı-aq jańa tehnologııalar men ınnovasııalardy damytý alańyna aınaldyrý kózdelip otyr. Birlesken qadam Qazaqstannyń álemdik arenadaǵy ǵylymı ustanymdaryn nyǵaıtýǵa, sondaı-aq jahandyq syn-qaterlerdi sheshýde uzaq merzimdi yntymaqtastyqqa jalǵaspaq.
ALMATY
