Galereıanyń ataýy ulttyq kıeli oryndar tizimine engen «Botaı qonysy» arheologııalyq ornymen baılanysty.
Saltanatty jıynǵa qatysqan Ǵaýez Torsanuly baǵa jetpes ulttyq kıeli jádigerler tizimine engen «Botaı qonysy» arheologııalyq ornynyń ereksheligin atap ótip, adamnyń jylqyny alǵash qolǵa úıretýi naq osy jerden bastalǵanyna toqtaldy. Buǵan elimizdiń soltústiginde ornalasqan «Botaı» qonysynan tabylǵan qazbalar dálel bola alady. Eskertkish bizdiń dáýirimizge deıingi IV-III myńjyldyqqa, ıaǵnı eneolıt dáýirine jatady. Soltústik Qazaqstan arheologııalyq ekspedısııasymen 1980 jyly ashylǵan.
«Jurtshylyq jańa óner ortalyǵynda túrli kórmelerdi qyzyqtap, kezdesýlerge qatysyp, jergilikti qylqalam ıeleriniń týyndylaryn da tamashalaı alady. Galereıa rýhanı ári shyǵarmashylyq damý aımaǵyna aınalaryna senimdimiz. Jańa nysannyń eń uzyn Qazaqstan Konstıtýsııasy kóshesinde ornalasýynyń rámizdik máni bar», dedi óńir basshysy.
Oblystyq tarıhı-ólketaný mýzeıiniń bólim meńgerýshisi Meıramgúl Ábýovanyń aıtýynsha, 1980 jyly arheologııalyq ekpedısııasynyń jetekshisi bolǵan tarıh ǵylymdarynyń doktory, arheolog Vıktor Zaıbert ejelgi adamdar mekenin Aıyrtaý aýdany Imanburlyq ózeniniń mańaıynan tapqan. Sodan beri Botaı qonysynyń jetistikteri álemdik deńgeıde úzbeı nasıhattalyp keledi.
«Osy Botaı qonysynyń ashylýy men jetistikterin halyqqa keńinen nasıhattaý, bul týraly málimetter berý – oblystyq mýzeı birlestigi jumysynyń baǵyttarynyń biri. Osy zamanaýı galereıa qalamyzdyń turǵyndary men qonaqtarynyń tartymdy orny, óńirdiń mádenı ortalyǵynyń biri bolady dep senemiz», dedi ol.
Sondaı-aq galereıanyń ashylý rásiminde Sýretshiler odaǵynyń músheleri, respýblıkalyq jáne halyqaralyq kórmelerge qatysýshy, «Azııa kóshbasshylary» syılyǵynyń laýreaty Ǵalııa Maqasheva, Memlekettik syılyqtyń laýreaty Sembiǵalı Smaǵulov sóz alyp, atalǵan óńirdegi aıtýly mádenı oqıǵanyń mańyzyna toqtaldy.
«Osyndaı kórme zaldary sýretshilerdiń erkin shyǵarmashylyq damýyna, tájirıbe almasýyna, ónýine óris ashady. Olardyń shyǵarmalary jyldan-jylǵa baǵasy ósetin ınvestısııa tárizdes. Sondyqtan ár qalanyń ózindik mýnısıpaldyq kórme zaly bolýy zańdylyq», deıdi sýretshi Sembiǵalı Smaǵulov.
Mádenıet jáne aqparat mınıstrligi Mádenıet komıtetiniń tóraǵasy Kúmis Seıitova da óziniń júrekjardy lebizimen bólisip, soltústikqazaqstandyqtardy Botaı zamanaýı kórkemsýret galereıasynyń ashylý saltanatymen quttyqtady. Botaı mádenıetiniń ashylýy tórtkúl dúnıeni dúr silkindirip, álemge kóshpeliler mádenıetiniń besigi órkenıettiń bastaýy bolǵanyn aıǵaqtaıdy.
Galereıa ekspozısııasyna qazaq óneriniń negizin qalaýshy sýretshilerdiń kartınalary, oblys aýmaǵynda jáne odan tys jerlerde turatyn qylqalam ıeleriniń, I jáne II halyqaralyq «Botaı – Uly dala mádenıeti» sımpozıýmyna qatysýshy sýretshilerdiń týyndylary usynylǵan.
