“JOL KARTASYNAN” TYS QALǴAN AÝYL

Aqsý qalasy aýmaǵyna qarasty Saryshyǵanaq aýyly oblys orta­ly­ǵy­nan 60 shaqyrym jerde orna­las­qan. О́ndiristi qalalardyń dál ortasynda tur. Shalǵaıda jatqan alys aýyl bolsa bir sári. Bizdiń tilshiler qosynyna aryz-shaǵymdaryn jazyp, buıym­taı­laryn ala jetken aýyl turǵyndary­nyń ókpeleri qara qazandaı eken. Jol túsip biz de sol aýylǵa baryp qaıttyq. Aıtsa aıtqandaı, máseleniń bar mánisi – barar jer, basar taý qalmaǵan soń, aýyldaǵy ákimdik, dárigerlik pýnkt, posh­ta bólimshesi, kitaphana, ýchaskelik polısııa barlyǵy túgelimen baryp aýyl­daǵy jalpy bilim beretin orta mekteptiń ishine ornalasyp alypty. Osylaı on jyl ómirleri ótipti. Qala ákimderi de aýysyp úlgeripti. Biraq ózgeris joq, sol qalpy. Mekteptiń ishi-syrty da ońyp turǵan joq, jóndeý kórmegen. Ábden shydamdary taýsylǵan mektep basshylyǵy budan aryǵa tóze almaımyz, onsyz da oqýshylardyń bilim alýlaryna bóget bolyp kele­siń­der, óz kúnderińdi ózderiń kórińder, aýylda balabaqsha joq, mektep ishinen 30 balaǵa arnalǵan shaǵyn ortalyq ashamyz, bólmelerdi bosatyńdar, depti. Sonda biz qaıda bararymyzdy bilmeı­miz. Dárigerlik pýnktke bes bólme kerek. Arnaıy úı joq, deıdi jergilikti bólimsheniń aǵa dárigeri Áıgerim Mantyqova. Qal­ǵan­dary da solaı. Aýyl ákimi Tóle­gen Áýbákirov te ákim­dikke bos úı izdep júrgen kórinedi. Biz kelgende mek­tep úıi ishinde topyrlaǵan  adam­dar boldy. “Bular ne ǵyp júrgen adamdar?” dep edik, “zeınetaqy alýǵa kelgen aýyldyń adamdary, poshta bó­lim­shesi de osynda ǵoı” degen jaýap estidik. Al aýylda bos turǵan asha­na, úsh bólmeli úı, sheberhana bar kórinedi. Ol bireýdiń menshigi, ony Jumageldi Qo­ja­novtan suraý kerek dep qaldy tur­ǵyndar. Sary­shy­ǵanaq aýylynda, Sýatkól men Jańasharýa bólimshelerin qosqanda, orysy bar, ýkraın, belarýs, nemis, tatar, bashqurty bar — barlyǵy myń­ǵa jýyq ár túrli ult ókilderi tatý-tátti ómir súrýde. Aýylda 100-ge jýyq mektep jasyna deıingi kishkene bala, sábı kútip júrgen  20 áıel bar eken. Mal-jan aman. Dastarqan toly. Aýyldyqtardy renjitkenderi “Jol kartasy” baǵdarlamasynyń ózderiniń aýyldaryna múlde kelmeı qoıǵany... Farıda BYQAI. Pavlodar oblysy.