Atalǵan grant 2021 jyldan bastap Memleket basshysynyń bastamasymen daryndy jastardy qoldaý maqsatynda berilip keledi. Grant mólsheri – 3 mln teńge. Oǵan konkýrstyq negizde 14 jastan 35 jasqa deıingi (34 jasty qosa alǵanda) azamattar úmitker bola alady.
Jalpy, resmı statıstıka derekterine súıensek, jyl basynda respýblıka jastarynyń sany (14-35 jas) 5 759 781 adamdy nemese halyqtyń jalpy sanynyń 30%-yn qurady (2022 jyly – 3 833 435 adam, 2023 jyl – 5 726 629 adam), onyń ishinde 2 937 229 er adam jáne 2 822 552 áıel.
Brıfıng barysynda Qaırat Qambarov volonterlikti qoldaý úshin 2024 jyldan bastap qosymsha «volonterlik» baǵyty qarastyrylǵanyn aıtty.
«2021 jyldan bastap Memleket basshysynyń bastamasymen jyl saıyn jastarǵa 3 mln teńge mólsherinde «Ǵylym», «Mádenıet», «Aqparattyq tehnologııalar», «Bıznes» jáne «Medıa» baǵyttary boıynsha «Táýelsizdik urpaqtary» granty beriledi. Grant berýdiń maqsaty – jastardyń belsendi shyǵarmashyl jastar qaýymdastyǵyn qalyptastyrýǵa baǵyttalǵan jańa jáne qazirgi kezdegi bastamalaryn memlekettik qoldaý. 2021 jyldan bastap 93 jas azamat respýblıkalyq deńgeıde «Táýelsizdik urpaqtary» grantynyń ıegeri atandy. Atap aıtqanda, 2021 jyly – 30 adam, 2022 jyly – 33 adam, 2023 jyly – 30 adam. Bıyldan bastap elimizdegi volonterlik salany qoldaý maqsatynda grant baǵyttarynyń tizbesinde qosymsha «volonterlik» kózdelgen. Osylaısha, 2024 jyldan bastap grant 6 baǵyt boıynsha beriletin bolady», dedi Q.Qambarov.
Jalpy, grant ıegerlerin anyqtaý eki kezeń boıynsha júrgiziledi. Konkýrsqa ótinimderdi qabyldaý 5 tamyzdan 6 qazanǵa deıin jalǵasady. Qazirgi ýaqytta konkýrstyq rásimder boıynsha jumystar júrgizilip jatyr.
Sondaı-aq jıyn barysynda «Táýelsizdik urpaqtary» grantynyń ıegerleri óz bastamalary týraly aıtyp berdi. Máselen, Jandos Aqtaevtyń jobasy qoljetimdi tilde halyqtyń bazalyq quqyqtyq saýattylyǵyn arttyrý boıynsha aqparattyq kontent qurýǵa arnalǵan. Al 2023 jylǵy «Táýelsizdik urpaqtary» grantynyń ıegeri Araılym Serikbaı granttyq qarajatqa «Ǵylym» baǵyty boıynsha zamanaýı jasyl agrotehnologııalary paıdalanylǵan «EcoTagam» ınnovasııalyq otandyq ekoprodýksııalar ortalyǵyn ashty.
Daryndy jastardyń jańa ıdeıalary men túrli jobasyn iske asyrý maqsatynda «Táýelsizdik urpaqtary» grantyn berý 2029 jylǵa deıin josparlanyp otyr.
