Memleket basshysynyń bastamasymen júzege asyrylǵan «Bilim berýdegi ózgeristerdiń 1000 kóshbasshysy» jobasy áli de jalǵasyp jatyr. Búgingi tańda irikteý men daıyndyqtyń barlyq kezeńinen ótken 136 qatysýshy dırektor bolyp taǵaıyndaldy. Onyń ishinde 20 dırektor jaıly mektepterdi basqarady.
Oqyrmandarǵa uǵynyqty bolý úshin tolyqtyra keteıik, Oqý-aǵartý mınıstrligi Memleket basshysynyń tapsyrmasymen 2023 jyldan bastap Prezıdenttik jastar kadrlyq rezerviniń úlgisimen bilim berýdegi ózgeristerdiń kóshbasshylaryn irikteý jáne daıarlaý jónindegi jobany iske asyryp keledi. Úmitkerler 8 aı boıy quzyrettilikti baǵalaý, úsh deńgeıli oqytý, elimizdiń jetekshi mektepterinde taǵylymdamadan ótý, qorytyndy baǵalaý jáne mınıstrlik janyndaǵy komıssııamen áńgimelesýden ótedi. Rezervke qabyldanǵan jańa býyn basshylary kadr máselesin sheshýge óz úlesin qosady, sonymen qatar jańa mektepterdi, onyń ishinde «Jaıly mektep» ulttyq jobasy aıasynda salynyp jatqan mektepterdi de basqarýǵa quzyretti bolady.
Mınıstrlik taratqan aqparatqa súıensek, bıyl jobanyń ekinshi kezeńi júzege asyrylyp jatyr. Jyl basynan beri mektepke deıingi, orta, tehnıkalyq jáne kásiptik bilim uıymdarynda eńbek etetin pedagogterden 13 796 ótinim qabyldanǵan. Testileý nátıjesi boıynsha kelesi kezeńge 900-ge jýyq úmitker ótti. Olar pedagogıkalyq sheberlik ortalyǵynda «О́zgeris kóshbasshylary: zamanaýı bilim berý uıymyn basqarýǵa jańa kózqaras» taqyryby aıasynda oqytýdan ótip jatyr. Ári qaraı áńgimelesý túrinde irikteýdiń sońǵy kezeńi uıymdastyrylady. Irikteýdiń barlyq 5 kezeńinen ótken qatysýshylar respýblıkalyq kadr rezervine alynady.
Bul týraly Orta bilim komıtetiniń tóraǵasy Qanybek Jumashev: «Oqýdan, taǵylymdamadan, áńgimelesýden ótken úmitkerlerge sertıfıkat beriledi. Sonyń negizinde odan ári jumysqa ornalasý úshin olar kadr rezervine engiziledi. Rezervtegiler birinshi basshynyń bos laýazymyna konkýrstyq rásimderden ótpeı taǵaıyndalady. Atap óteıik, barlyq kezeńnen sátti ótip, sertıfıkat alǵandarǵa «basshy-kóshbasshy» biliktilik sanaty beriledi», dep túsindirdi.
