«NKOK» kompanııasynyń qarjylandyrýymen byltyr mamyr aıynda qazyǵy qaǵylǵan mekteptiń qurylysy bıyl jańa oqý jyly qarsańynda tolyqtaı aıaqtalyp, paıdalanýǵa berildi. Bilim kúninde aýyldyń 62 oqýshysy jańa mektep tabaldyryǵyn attady. Bilim oshaǵy 100 oqýshyǵa arnalǵan. Onda 11 oqý kabıneti, 2 ınformatıka, 1 lıngafon kabıneti, akt jáne sport zaly bar. Ekiqabatty mektep ǵımaratynda múmkindigi shekteýli jandarǵa arnalǵan múgedekter kótergishi ornatylǵan. Bilim ordasynyń aýmaǵy zamanǵa saı abattandyrylyp, sport alańy salynǵan.
– Búgin Beki aýylynyń turǵyndary kópten kútken qýanyshty jańalyqpen qaýyshyp otyr. Aýylymyzda paıdalanýǵa berilgen jańa mektep zaman talabyna saı jabdyqtalǵan. Synyp bólmelerinde sabaq berýge qajetti quraldardyń bári bar. Máselen, qyz balalarǵa as pisirip úıretetin arnaıy bólme, er balalarǵa arnalǵan eńbek kabıneti, sportzal – bári de kóz tartady. Sondaı-aq mektep aýlasy tolyqtaı abattandyrylǵan. Bizge osyndaı zamanaýı mektep salyp bergen Mańǵystaý oblysy men Mańǵystaý aýdany ákimdigine, oblystyq bilim basqarmasyna jáne «NKOK» kompanııasyna aýyl turǵyndary men mektep ujymy atynan alǵysymyz sheksiz, deıdi mektep basshysynyń mindetin atqarýshy Aıjan Moldasheva.
Buǵan deıin bastaýysh synyp qana oqyp kelgen mektepte endi 1–9 synyp oqýshylary bilim alady.
Bıyl Mańǵystaý oblysy boıynsha Aqtaý qalasynan – 10, Jańaózen qalasynan – 2, Munaıly aýdanynan 2, barlyǵy 6 120 oryndyq 14 jekemenshik mektep ashyldy.
Al jańa oqý jylynda paıdalanýǵa berilip, Bilim kúni shákirtterin qabyldaıdy dep eseptelgenimen, túrli máselelerge baılanysty ashylýy keıinge qaldyrylǵan mektepter de joq emes. «Bilim berý ınfraqurylymyn qoldaý qory» arqyly salynǵan 4 800 oryndyq 4 mektep, ıaǵnı Aqtaý qalasynyń 18-shaǵyn aýdanynda 1 200 orynǵa arnalǵan jalpy bilim berý mektebi, Aqtaý qalasynyń 19A shaǵyn aýdanynda 1 200 orynǵa arnalǵan jalpy bilim berý mektebi, Munaıly aýdany Basqudyq aýyldyq okrýginiń Alaý turǵyn alabynda 1 200 oryndyq jalpy bilim berý mektebi men osy aýdandaǵy Qyzyltóbe aýyldyq okrýginiń Qyzyltóbe-2 turǵyn alabynda 1 200 orynǵa arnalǵan jalpy bilim berý mektebi bala qabyldaýǵa daıyn bolmaı shyqty. Bilim basqarmasy qyzmetkerleriniń aıtýynsha, atalǵan mektepterdiń qujatyna baılanysty jumystar aıaqtalsa, qyrkúıek aıynyń ishinde balalardy qabyldaıdy.
Sondaı-aq Aqtaý qalasyna kóship kelýshi turǵyndardyń qatary artqan saıyn, oqýshylardyń da sany kóbeıip otyr. Mysaly, bıylǵy jańa oqý jylynda Mańǵystaý oblysy boıynsha 188 myńǵa jýyq oqýshy mektepke bilim alýǵa kelse, sonyń ishinde 1-synypqa 19 myńǵa jýyq bala qabyldanǵan. Bilim basqarmasynyń málimetinshe, mektep oqýshylary bıyl ótken jylmen salystyrǵanda 3 paıyzǵa, al sońǵy úsh jylda 7 paıyzǵa artqan.
Mańǵystaý oblysy
