Tuńǵysh ret halyqaralyq deńgeıde uıymdastyrylǵan «Uly dala joryǵy» dodasyna elimizden 8 komanda, syrt elderden 9 komanda qosyldy. Bes kúnge ulasatyn uly dúbirdi Botaıdan atqa qonǵan sańlaqtar 7 qyrkúıekte Astanada aıaqtaıdy.
Birinshi kezeńniń 100 shaqyrymdyq qashyqtyǵynda Qyrǵyzstan komandasy ózgelerden edáýir alda keldi. Jerebe tartý kezinde de qyrǵyz shabandozdaryna joryqtyń túńligin túrip, birinshi bastaý múmkindigi buıyrǵan edi. Kórshiler halyqaralyq marafon-báıgege qatysatyn shabandozdardy da, júırikterdi de irikteý arqyly aıqyndap, synaq báıgesin de ótkizip úlgeripti. О́z elderinde 300 shaqyrymdyq marafon-báıge uıymdastyryp, attardyń tynysyn, shabandozdyń shydamyn tekserip alǵan eken. Kórshi elden kelgen komandanyń bapkeri Jeńisbek Batyrqulov shákirtteriniń betalysyna kóńili toǵaıatynyn aıtty.
«Mundaı uzaq qashyqtyqtaǵy marafon-báıgege buryn-sońdy qatysyp kórgenimiz joq. Degenmen de qyrǵyz attarynyń myqtylyǵyn pash etsek dep, táýekelmen qosyp otyrmyz. Birinshi kezeńde jigitter top bastap keldi. 50 shaqyrymdy 2 saǵat 40 mınýtta shaýyp ótip, mereıimizdi tasytyp edi, qalǵan 50 shaqyrymda da aldyna qara túsirgen joq. Halyqaralyq dodanyń uıymdastyrylýyna esh min aıtpaımyz, bári kóńilden shyǵyp otyr. Ár úzilis saıyn veterınarlar tulparlardyń tynysyn tekserip, júrek qaǵysyn, qan aınalymyn da qadaǵalaıdy. Shabandozdardyń da ahýaly – jiti baqylaýda. Qysqa kúnde qyryq qubylǵan aýa raıynyń da buzylýy kedergi bolmasa eken dep tileımiz. Joryqqa negizinen jańa qyrǵyz tuqymy, baıyrǵy jylqy tuqymdaryn da synap kórmekke bel býdyq. Bul dodanyń ótetinin eki aı ýaqyt qalǵanda estip, birden daıyndyqqa kiristik. Qyrǵyzstandaǵy respýblıkalyq irikteý báıgesine 25 at qosylyp, sonyń arasynan 5 júırikti tańdap aldyq. Arǵymaqtardy tizgindegen bes shabandoz halyqaralyq marafon-báıgege qatysyp otyr. Júldeli orynnan kórinsek dep barymyzdy salamyz. Ál-ázir kómbeniń qarasy alys, 300 shaqyrymdy artqa tastaǵan soń, úzdikter aıqyndala bastaıdy. Qazaqstannan qosylǵan komandalardyń attary da tózimdi, shydamdy eken. Bul da báıge, kimniń baǵy janyp, baby kelisedi, júlde soǵan buıyrady», dedi J.Batyrqulov.
Birinshi kezeńniń qorytyndysy boıynsha Qyrǵyzstan komandasy 100 shaqyrymdy 5 saǵat 12 mınýt 23 sekýndta shaýyp ótip, kósh bastap tur. 2-orynǵa turaqtaǵan Jambyl oblysynyń «Áýlıeata» komandasynyń shabandozdary 5:24:19 sekýndta keldi. Úshtikti Almaty qalasynyń «Alataý» komandasy 5:25:01 ýaqyt kórsetkishimen túıindedi. Birinshi kúnniń báıgesin 5:30:46 sekýndta óndirgen Mańǵystaý oblysy tórtinshi satyǵa jaıǵassa, besinshi oryn 5:40:10 ýaqytta kelgen Qostanaı oblysynyń shabandozdaryna buıyrdy. Ekinshi kezeńge attanǵan qatysýshylar arasynda ázirge tek Iran komandasynyń ǵana qatary túgel emes, 100 shaqyrymdy bes shabandozy da shaýyp ótkenimen, ekinshi kezeńge olardyń bir aty jaramaı qaldy. Pavlodar oblysynyń jergilikti jaby tuqymynan iriktelgen júırikterdi tizgindegen Iran shabandozdary ekinshi kezeńdi tórt atpen bastady. О́ıtkeni kúreń tóbel arǵymaqtyń artqy aıaǵy taǵalanbaǵandyqtan, tastaq jolda tasyrqap, veterınar mamandar kelesi kezeńge ótkizbedi. Biraq buǵan moıyǵan ırandyq shabandozdar joq. Birinshi kúnniń qorytyndysynda kósh sońynda qalǵanyna qaramastan, barlyq kezeńge qatysýdan úmitti, endi qalǵan tórt at súrinbese ıgi dep tilep otyr.
«Uly dala joryǵy» halyqaralyq marafon-báıgesin uıymdastyrý alqasynyń múshesi Sáken Seıithan birinshi kezeńniń alǵashqy 50 shaqyrymyn shaýyp ótý shabandozdarǵa da, astyndaǵy arǵymaqtaryna da jeńil tımegenin atap ótti.
«Qazaq pen qyrǵyz baýyrlas el bolǵandyqtan da, ulttyq sport túrlerinen qashanda bir-birine laıyqty básekelestik týdyrady. Qyrǵyz komandasy jalpy nátıjemen top basynda. Birinshi kezeńde 50 shaqyrym jol negizinen tastaq boldy. Mańaıdyń bári egistik alqap bolǵandyqtan, keı tusy sazdaýyt tartqandyqtan da, tastaq joldan qıys júrýdiń reti bolmady. Endigi kezeńderde mundaı qıyndyq týyndamaıdy dep senemiz», deıdi S.Seıithan.
