Baqyt Aqanuly akademııada 2015 jyldan beri qyzmet atqarady. Oǵan deıin Soltústik Qazaqstan oblysyndaǵy M.Qozybaev ýnıversıtetinde oqytýshy bolyp jumys istegen. Oǵan deıin Ál-Farabı atyndaǵy Qazaq ulttyq ýnıversıtetinde tarıh jáne din mamandyǵy boıynsha magıstratýrada bilimin shyńdaǵan.
«Jalpy bilim berý kafedrasynda qyzmet etemin. 90-nan astam ǵylymı maqala, 2 ǵylymı monografııa jazdym. Bir monografııam «Mádenı mura» baǵdarlamasy aıasynda Soltústik Qazaqstan oblysynyń tarıhy, arhıtektýrasy, eskertkishteri, arheologııasy taqyrybynda birneshe ǵalymnyń qatysýymen jazyldy. Bul eńbekti jazyp shyǵýǵa úsh jyl ýaqytymyz ketti. 900 betten turatyn zertteýimiz barlyq óńirdegi kitaphanalarda bar. 2015 jyly sol kezdegi Ulttyq ulan bas qolbasshysynyń buıryǵymen akademııada jańa kafedra ashyldy. Buǵan deıin bul basqa kafedra quramynda bolǵan. Osy kezeńde ol jeke kafedra bolyp quryldy. Jańa shtat jasaqtaldy. Bizge kafedranyń deńgeıin kóterý júkteldi. Maqalalar jaza bastadyq. Bul jerde buryn kýrsanttarmen eshkim ǵylymı jumys júrgizbegen eken. Kýrsanttardyń ǵylymı qaýymdastyǵymen jumys júrgize bastadyq. 2017 jyly Qostanaıda ornalasqan Sh.Qabylbaev atyndaǵy IIM akademııasynda kýrsanttar arasynda halyqaralyq ǵylymı konkýrs boldy. Oǵan ózge memleketterden qatysýshylar keldi. Elimizdiń de ózge áskerı vedomstvolarynan úmitkerler qatysty. Konkýrsta bizdiń akademııa kýrsanttary birinshi oryn ıelendi. Olar áskerge memlekettik tildi engizý taqyrybyn qorǵady. Kýrsanttar arasyndaǵy dinı toleranttylyq pen qarym-qatynas máselesin kóterdi», deıdi akademııanyń qatarynan eki ret úzdik oqytýshycy atanǵan Baqyt Aqanuly.
Ustaz ben shákirtteriniń jetistikteri munymen toqtalyp qalǵan joq. 2022 jyly IIM-niń vedomstvoaralyq konkýrsyna qatysyp birinshi oryn alǵany taǵy bar. Taqyryby – «Koronavırýs pandemııasyna baılanysty jarııalanǵan tótenshe jaǵdaı kezinde onlaın sabaq ótkizý». Naqtyraq aıtqanda, kýrsanttar men oqytýshylar arasyndaǵy ınternet baılanysy kezindegi qaýipsizdik máselesin jan-jaqty kóterip, oqý úderisin jalǵastyrý joldary zerdelendi. Baqyt Aqanulynyń aıtýynsha, sol kezde úzdik atanǵan kýrsanttar búginde ásker qatarynda laýazymdy qyzmetter atqaryp júr. Qýantatyny sol, sarbazdardy ǵylym salasyna baýlıtyn dástúr jalǵasyp keledi. Oqytýshylar birinshi kýrsqa kelgen kýrsanttar arasynan ǵylym-bilimge jaqyn birneshe balany iriktep, olarǵa ǵylymı izdenistiń alǵysharttary men maqala jazýdyń qyr-syryn úıretedi. Osydan birneshe aı buryn akademııa kýrsanttary Almatyda ótken halyqaralyq ǵylymı jumys baıqaýynan oljaly oraldy. Bul joly olar sý tasqyny mysalyndaǵy oqý úrdisi jaıynda joba qorǵap shyqty. Akademııada kýrsanttardan bólek, oqytýshylar quramy da udaıy bilimin jetildirip otyrady.
«Byltyr bizdiń kafedradan úsh adam Tashkent qalasyndaǵy Qoǵamdyq qaýipsizdik ýnıversıtetine doktarantýraǵa oqýǵa tústik. Bıyl birinshi kýrs bitirip jatyrmyz. Oqý demalysyn alyp, emtıhan kezderinde baryp keletin múmkindigimiz bar. Qazir ǵylymı jetekshilerimizben tanysyp, ózimiz zertteıtin taqyryptardy aıqyndadyq. Doktorlyq jumysymnyń taqyryby – «Qazaqstan men О́zbekstannyń áskerı joǵary oqý oryndary arasynda akademııalyq aýysym jumystaryn uıymdastyrý». Máselen, azamattyq ortadaǵy joǵary oqý oryndarynda bilim alatyn stýdentter sheteldik bilim ordalaryna akademııalyq aýysymmen bara alady. Iаǵnı sol jaqta keminde bir semestr bilim alyp, tájirıbe almasady. Osyndaı múmkindikterdiń áskerı bilim ordalarynda da bolǵanyn qalaımyn. Bul bakalavrdan bólek, magıstratýrada bilim alatyn ofıserler úshin mańyzdy sanalady», deıdi B.Aqanuly.
Qyzmetine shyn berilgen oqytýshy otbasylyq ómirin de nazardan tys qaldyrmaǵan. Balalarynyń da bilimdi, elgezek azamat bolyp ósýi úshin laıyqty tárbıe berip júr. «Áke kórgen oq jonar» demekshi, búginde keıipkerimizdiń úlken balasy Ystanbul memlekettik ýnıversıtetinde halyqaralyq quqyq jáne saýda mamandyǵy boıynsha 4-kýrsta bilim alyp jatyr. Al ekinshi uly mektepte úzdik oqıdy. Úıdiń kenjesi bir jasta. Qaýyrt qyzmette júrse de áskerı ǵylymnyń damýyna úles qosyp, otbasy aldyndaǵy jaýapkershiliktiń júgin umytpaǵan ulandyqtyń Otan aldyndaǵy mindetine de minsiz bolaryna kúmán joq.
