Matchtan keıin bas bapker Stanıslav Cherchesov jańa maýsymdy sátti bastaǵan qurama oıynshylarynyń oıynyna kóńili tolatynyn jetkizdi. «Ázirge fýtbolshylardyń oıyn júıesine qatysty eshteńe aıta almaımyn, qorǵanystan shabýyldy óristetip áketýde doptan aıyrylyp qalýǵa bolmaıdy, árbir sát – múmkindik. Kelesi matchqa deıin búgingi tartystyń jazbasyn qaıtalap kórip, kem tusymyzdy bútindeımiz. Komandanyń qorǵanysyndaǵy oıynshylar baryn salyp, qarsy jaqtyń birneshe shabýylyn toqtatty. Mundaı ujymnyń qaıratyna tótep berý jeńil soqpaıdy», dedi bas bapker.
Anglııanyń «Manchester Sıtı» fýtbol klýbynyń shabýylshysy Holandqa arqa súıegen ujymdy shiderlep, erkin oıqastaýyna múmkindik bermegen ulttyq qurama oıynshylary kelesi matchty 9 qyrkúıekte syrt alańda Slovenııa fýtbolshylaryna qarsy ótkizedi.
Dzıýdoshylardyń deńgeıi joǵary
Parıjde ótip jatqan Paralımpıada oıyndarynda para dzıýdodan synǵa túsken Erǵalı Shámeı (J1) 73 kg salmaq dárejesinde kúmis júldeger atandy. Fınaldyq beldesýge deıin tegeýrindi qarsylastaryn jyqqan balýan altyn medal úshin ótken tartysta rýmyn sportshysyna ese jiberdi.
Áıelder arasynda Paralımpıada dodasynan Daıana Fedosova qola medal oljalady. J2 sanatynda synǵa túsken balýan qyz jartylaı fınalda japon balýanyna ese jibergen, qola medal úshin ótken tartysta túrik qarsylasynan basym tústi.
Fransııada ótken jazǵy Olımpııa oıyndary men Paralımpıada dodasynda dzıýdo kúresinen balýandarymyz orasan jetistikke jetip, el mereıin asyrdy. Jazǵy Olımpıada oıyndarynda Eldos Smetov (60 kg) osy sport túrinen chempıon atansa, Ǵusman Qyrǵyzbaev (66 kg) qola júlde enshiledi. Endi mine, Paralımpıada oıyndarynda para dzıýdoshylar arasynan alǵash bolyp Aqmaral Naýatbek (J2 sanaty, 48 kg) altyn medal ıelendi. Erǵalı Shámeı (J1 sanaty, 73 kg) kúmis, Daıana Fedosova (J2 sanaty, 57 kg) qola júldeger atandy.
