Sýretterdi túsirgen – Erlan OMAR, «EQ»
8-13 qyrkúıek aralyǵynda «Qazanat» ıppodromynyń mańynan boı kótergen etnoaýylda kúnde dýman, kúnde toı. Munda etnosport saıystardyń tartysynan syrt mádenı baǵdarlamalar da kópshilik nazaryna usynylady. Qazaq halqynyń baı murasy men dástúr saltyn dáripteıtin «Shattyq kerýeni» sherýmen ashylǵan aýyldyń bazary Dúnıejúzilik kóshpeliler oıyndary bitkenshe tarqamaıdy. Etnoaýylǵa tabany tıgen turǵyndar men qala qonaqtary kóshpeliler álemine boılap, ór rýhty tereń sezinedi.
«О́ner ordasy» atalatyn bas sahnada kúnde ár óńirden kelgen úzdik óner ujymdary óner kórsetip, «Dýmandy dala» konserti ótedi. Etnofolklorlyq ansambl, qazaq ulttyq orkestrleri ánmen kómkerse, bı toptary dástúrli etnostyq stılde óner kórsetedi. Qazaqtyń tól murasy aıtys ta kóshpeliler oıyndarynyń dańqyn asyryp, ár óńirden kelgen úzdik aıtysker aqyndar sara sóz dodasyna túsedi.
«Kóshpeliler áleminiń» ishinde irge tepken etnoshatyr alańy qonaqtarǵa qolóner sheberleri men ismerlerdiń týyndylarynan kórme uıymdastyrylsa, «Shyǵys bazaryna» kelgen kópshilik qazaqtyń ulttyq taǵamdaryn usynǵan meıramhanalardan dám tatady. Dúnıejúzilik kóshpeliler oıyndarynyń rámizi sanalatyn kádesyılardy da osy mańnan tabasyz. Ortalyq alańda ulttyq oıyn túrlerin qamtyǵan balalar alańqaıy da bar. Halyq mýzykasyna arnalǵan sahna, ashyq aspan astyndaǵy kóshpeli halyqtyń baı murasynnan syr shertetin órkenıetter murajaıy, sporttyq is-sharalar ótetin oryn da bar.
«Kóshpeliler álemi» etnoaýylda ótetin is-sharanyń barlyǵyna kirý tegin. Kúndelikti saǵat 11.00-den túngi 21.00-ge deıin aralaýǵa bolady. Astanada ótip jatqan Dúnıejúzilik kóshpeliler oıyndaryna oraı «Qazaq eli» monýmenti, «Atatúrik» parki, «Báıterek» monýmenti men Ortalyq saıabaqta da etnoaýyldar ashylyp, qala turǵyndary men qonaqtaryna konserttik baǵdarlama usynylyp, sporttyq oıyndardan saıys ótkiziledi.
