«Mýzeı kóp jyldar boıy Almatydaǵy Koreıa Respýblıkasynyń Bas konsýldyǵymen yntymaqtasa jumys istep, koreı halqynyń tarıhy men mádenı dástúrleriniń ártúrli aspektilerin kórsetetin kórmeler ótkizip keledi. Ortalyq mýzeıde «Chekkorı» (natıýrmort) ataýymen uıymdastyrylǵan kórme el azamattaryna koreı sheberleriniń baı mádenıetimen jáne halyq keskindemesimen tanysýǵa múmkindik beredi», dep atap ótti is-sharany saltanatty túrde ashqan QR Memlekettik ortalyq mýzeıiniń dırektory Rashıda Harıpova
Sondaı-aq Koreı Respýblıkasynyń Qazaqstandaǵy Bas konsýly Pak Nechhon mádenı sharalar qos el arasyndaǵy dostyq pen yntymaqtastyqty nyǵaıtýda mańyzdy ról atqaratynyn aıta kelip, kórmeni uıymdastyrýǵa kúsh-jiger jumsaǵan jandarǵa alǵys bildirdi.
«Chekkorı» kórmesi – koreı eliniń dástúrli «Mınhva» ónerimen jáne onyń biregeı stılimen tanysýǵa múmkindik beredi. Kórmeniń ashylýynda «Mınhva» halyq óneri mektebiniń dırektory Chon Bıon Mo «Chekkorı» kórmesiniń mańyzy jáne qazirgi mádenıettegi dástúrli «Mınhva» stıliniń tanymaldyǵy týraly baıandady.
«Chekkorı» - Koreıadaǵy kitap taqyryby bar natıýrmorttyń ataýy. Álemde bul ónerdiń kóptegen úlgileri bolǵanymen, Choson áýleti dáýirinde bul baǵyt órleı túsken. Ol tusta kitap (1392-1910 jj.) úlken qundylyqqa ıe bolyp, zııalylyqtyń kórsetkishine aınalǵan desedi. Bul óz kezeginde shyǵarmashylyqtyń damýyna septigin tıgizgen.
- «Mınhva» - koreılik estetıka men tunyq sezimge qurylǵan, eń baıyrǵy koreı tamyry bar keskindeme; qarańǵy reńktersiz, jarqyn jáne kóńildi, tek oń energııa beretin keskindeme. Mınhva» óneri sońǵy kezderi álemde tanymal bolyp keledi. Qazirgi ýaqytta bul óner túriniń 200 myńnan astam izbasarlary bar. «Chekkorı» kórmesiniń azııalyq týry Qazaqstan Respýblıkasy Memlekettik ortalyq mýzeıinen bastaldy. 40 zamanaýı óner sýretshileri «Mınhva» kitaptardy túrli qııal álemderin kórsetý úshin pán retinde paıdalandy. Munda kórermender koreı halqynyń tarıhy men mádenıetiniń baılyǵyna toly óner álemin tamashalaı alady, - deıdi mýzeı mamandary.
Kórmeniń saltanatty ashylýynda «Namson» dástúrli koreı óneri stýdııasynyń ártisteri men T. Júrgenov atyndaǵy óner akademııasynyń stýdentteri óner kórsetti.
