Foto: Sýretti túsirgen: Álı Ǵalym
M.Áýezov atyndaǵy Ońtústik Qazaqstan ýnıversıteti – elimizdegi jetekshi tehnıkalyq joǵary oqý oryndardyń biri. Onyń túlekteri eńbek naryǵynda keń suranysqa ıe. Olar – elektr energetıka, mashına jasaý, fızıka, hımııa jáne ózge de sala mamandary. AES salýdy qoldaý jónindegi Halyqtyq shtab músheleri óńirdegi stýdentterimen jáne jas belsendilermen kezdesti.
Májilis Spıkeri, «AMANAT» partııasynyń Tóraǵasy Erlan Qoshanov jastar únemi jańa úrdisterdiń basy-qasynda júretinin jáne memleket damýynyń basty qozǵaýshy kúshi sanalatynyn atap ótti.
«Jastardyń qoǵamdaǵy róli erekshe. Elimizdegi eń mańyzdy sheshimder jastarmen aqyldasyp qabyldanyp jatyr. Bul – Prezıdentimizdiń negizgi ustanymy. Sizder, bolashaq ınjenerler, aldaǵy ýaqytta Táýelsiz Qazaqstan ekonomıkasynyń damýyna óz úlesterińizdi qosasyzdar, jańa óndiris oryndaryn qoldanysqa engizesizder jáne ınnovasııalyq tehnologııalardy damytasyzdar. Sizder aldaǵy referendýmda sanaly tańdaý jasaı alý úshin búgin biz ózderińizben atom elektr stansııasynyń qurylysyn talqylaýǵa keldik», dedi Erlan Qoshanov.
Budan soń AES salýdy qoldaý jónindegi Halyqtyq shtab músheleri zııaly qaýym ókilderimen kezdesti. Is-shara barysynda atom energetıkasyna qatysty barlyq másele boıynsha jurtshylyqty keńinen habardar etýdiń mańyzy jáne halyq arasynda erekshe bedelge ıe adamdar retinde mádenıet qaıratkerleriniń bul istegi róli talqylandy.
Osy kúni Shtab músheleri «Tassaı» ındýstrııalyq aımaǵyna baryp, kásipkerlermen jáne eńbek ujymdarymen kezdesti. Olar atom energetıkasynyń múmkindigi, jańa óndiris oryndaryn damytý perspektıvalary jáne laıyqty eńbek jaǵdaıyn jasaý jóninde áńgimelesti.
