AQTО́BE. 27 sáýir. Aqtóbedegi Qazaqstan Respýblıkasynyń Tuńǵysh Prezıdenti Nursultan Nazarbaev atyndaǵy ortalyq saıabaqta jeńimpazdar forýmy asqan uıymshyldyqpen ótti. Bul týraly egemen.kz habarlady.
Júzderinen qýanysh lebi esken aqtóbelikter túske taman saıabaqty lyq toltyrdy dese de bolady. Myńdaǵan qala turǵyndary, «Nur Otan» partııasynyń belsendileri, jastar men stýdentter qatysqan bul shara aqtóbelikterge qóterińki kóńil-kúı syılady.
Jeńimpazdar forýmynda oblystyq máslıhattyń hatshysy Sánııa Qaldyǵulova prezıdenttik saılaýdyń óńirde demokratııalyq talaptarǵa saı uıymshyldyqpen jáne saılaýshylardyń joǵary belsendigimen ótkenin atap ótti. «Nur Otan» partııasynyń kandıdaty is basyndaǵy Prezıdent Nursultan Nazarbaevtyń aıqyn basymdyqpen jeńiske jetkenin, qazaqstandyqtardyń durys tańdaý jasaǵanyn jetkizdi.
Onyń aıtýynsha, oblys saılaýshylarynyń 96,7 paıyzy saılaýǵa qatysqan. Odan keıin «Nur Otan» partııasy oblystyq fılıaly tóraǵasynyń birinshi orynbasary Mádı Eleýsizov, Qazaqstan Respýblıkasynyń Mádenıet qaıratkeri Erkin Qurmanbek, sondaı-aq, Beıbitshilik jáne kelisim keńesi oblystyq bólimshesiniń tóraǵasy Keldibaı Espaǵambetov quttyqtaý sózderin arnady.
«Bizdiń kásiporynda kóptegen jumysshylar áýleti eńbek etedi. Bizdiń áýlettiń osy zaýyttaǵy jalpy jumys ótiline 50 jyl bolady. Biz áýletimizben Nursultan Ábishulyn qoldap daýys berdik. Prezıdent Qazaqstandy damýdyń dańǵyl jolymen alyp keledi», – deıdi Aqtóbe ferroqorytpa zaýytynyń balqytýshysy Erjan Atyraýbaev.
Sharada sóz alǵan qalalyq máslıhattyń depýtaty, seriktestik basshysy Ánýar Tasymov, Jubanov atyndaǵy memlekettik óńirlik ýnıversıtetiniń stýdenti Azamat Ábilqaıyr qazaqstandyq jastarǵa barlyq jaǵdaı týǵyzylǵanyn Elbasynyń sarabdal saıasatymen sabaqtastyrdy.
Jeńimpazdar forýmynyń sońy jergilikti ónerpazdardyń án-jyryna ulasty.
Satybaldy Sáýirbaı.
Derek, sýret: egemen.kz.
