Qaraǵandy oblysynyń óner ujymy da konserttik baǵdarlamasyn usyndy. Atap aıtsaq, estrada juldyzdary, Qazaqstannyń eńbek sińirgen qaıratkerleri Maqpal Júnisova men Jámılá Baspaqova qulaq quryshyn qandyryp án shyrqasa, Q.Baıjanov atyndaǵy konserttik birlestiginiń Táttimbet atyndaǵy akademııalyq qazaq halyq aspaptar orkestri súıemeldep otyrdy. Sondaı-aq S.Seıfýllın atyndaǵy akademııalyq qazaq drama teatrynyń ártisteri arnaıy qoıylym kórsetti.
«Aqqý» folklorlyq horeografııalyq ansambli men jeke oryndaýshy solısteri de baǵdarlamadan tys qalǵan joq.
«Tarlan» etnotobynyń «Jumyr qylysh» kúıine dızaınerler Gúlnur Jarylhanova men Múslám Jumaǵalıevtiń etnokostıýmderin «Art line» modeldik agenttigi halyqqa kórsetti. Budan bólek Aqtoǵaı aýdanynan «Toqyraýyn tolqyndary» halyqtyq án-bı ansambli, «Jarqyn» halyqtyq horeografııalyq ansambli men «Sholpan» úlgili horeografııalyq ansambli de sahnaǵa shyqty.
Etnoaýyldaǵy mádenı dýmannyń kórkin aıtys aqyndarynyń shappa-shap sóz qaǵysy qyzdyra tústi. Ortada aıtys ónerine jańadan qadam basyp kele jatqan jastar men elge belgili aǵa býyn aıtysker aqyndar óner kórsetti. Qaraǵandy oblysyn osy óńirdiń týmasy, «Altyn dombyra» ıegeri Maqsat Ahanov pen Erkeǵalı Bekbolat sharyqtata tanystyrdy.
Sondaı-aq etnoaýylda apta boıy kún saıyn elimizdiń eń úzdik sheber-qolónershileriniń kórme-jármeńkesi, olardyń jumystary men sheberlik saǵattary kórsetilip jatyr. Kórmege Qaraǵandy oblysynyń on qolóner sheberi qatysyp, bylǵarydan, kıizden, aǵashtan jasalǵan buıymdar, qysh jáne zergerlik buıymdardy usyndy.
Etnoaýylda Qaraǵandy oblysynan úsh kıiz úı ornatylǵan. 12 qanatty kıiz úıde oblystyq ólketaný murajaıynyń eksponattary, birinshi segiz qanatty kıiz úıde S.Seıfýllın atyndaǵy teatr ujymy ádet-ǵuryptar men salt-dástúrlerdi beınelep kórsetse, ekinshi segiz qanatty kıiz úıde Qaraǵandy oblysynyń ekonomıka, mádenıet jáne sporttyń túrli salalaryndaǵy jetistikteri usynyldy. Mádenı baǵdarlamaǵa oblystan jalpy sany 200-ge jýyq ónerpaz qatysqan.
«Birlik kerýeni» teatrlandyrylǵan sherýge S.Seıfýllın atyndaǵy teatrdyń akterleri, horeografııalyq ansamblder, at sportshylary, búrkitshiler, ańshylar tazysymen qatysty.
