Jańadan boı kóteretin «Bolashaq Sarayi» oqýshylar saraıyn qaladaǵy balalar men jastardyń jan-jaqty damýyna barlyq jaǵdaı jasalǵan zamanaýı bilim uıymy men mádenı ortalyq retinde salý josparlanǵan.
– Memleket basshysy Qasym-Jomart Toqaevtyń qabyldaýynda bolǵan kezde Jańaózen qalasynda oqýshylar saraıyn tezdetip salýdy tapsyrǵan edi. Sol kúnnen bastap qurylysqa qatysty jumys júrgizile bastady. Mańǵystaýdyń bolashaǵy – bilimdi, kreatıvti jastarymyzdyń qolynda. Nysan jas urpaqtyń shyǵarmashylyq qabiletin damytýǵa, jańa múmkindikterdi ıgerýge jol ashady. Básekege qabiletti balalarymyz elimizdiń damýyna óz úlesin qosatynyna senimdimin, – dedi nysannyń irgetasyn qalaýǵa qatysqan Mańǵystaý oblysynyń ákimi Nurdáýlet Qılybaı.
Mańǵystaý oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi jospary aıasynda júzege asyrylyp jatqan Oqýshylar saraıynyń qurylysyn qarjylandyrý «QazMunaıGaz» UK» AQ enshiles kásiporny «О́zenmunaıgaz» AQ-nyń jeke qarajaty esebinen júrgiziledi.
– Ulttyq kompanııa Jańaózen qalasynyń damýyna, turǵyndarǵa paıdaly áleýmettik nysandardyń boı kóterýine mán beredi. Bıyl sáýir aıynda ǵana paralımpıadashylarǵa arnalǵan «Alǵa» sport kesheni ashyldy. Kompanııa Jańaózen oqýshylaryna jan-jaqty qoldaý kórsetedi. «Jarqyn bolashaq» granttyq baǵdarlamasy boıynsha elimizdiń úzdik bilim oryndarynda, túrli óner kolledjderi men sport mektepterinde bilim alýǵa 600-den asa grant bólindi, dedi «QazMunaıGaz» UK» AQ basqarma tóraǵasy Ashat Hasenov.
350 oryndyq ǵımarattyń aýdany 3 myń sharshy metrdi quraıdy. Saraıda robottehnıka, baǵdarlamalaý, 2D/3D modeldeý, shet tilderi, kıim dızaıny men tigin, qolóner, vokal jáne halyq aspaptarynda oınaý kabıneti ashylady. Sondaı-aq jańartylatyn energııa kózderi, qoldanbaly jáne jaratylystaný ǵylymdarynyń zerthanalary, beıneleý óneri stýdııasy, ártistik, jýrnalıstıka, horeografııaǵa arnalǵan telestýdııalar qurylady.
«QazMunaıGaz» UK» AQ basqarma tóraǵasy Ashat Hasenovtiń kompanııanyń qalaǵa áleýmettik nysandar salýǵa mán beretinin aıtqandyǵyn eskersek, Jańaózende jaqsy ister jalǵasyn tabady degen senim bar.
Mańǵystaý oblysy
