Sýretti túsirgen – Erlan OMAR, «EQ»
Kókpar dodasynyń qola júldesi úshin Reseı quramasy Túrkııadan kelgen kókparshylarǵa qarsy saıysqa shyqty. Quramasyn negizinen qyrǵyz kókparshylarynan jasaqtaǵan Reseı oıynshylary jeńiske jetýge asa kóp kúshin sarqı qoımady. 8:2 nátıjesimen utyp, qola medal ıegeri atandy.
Negizgi tartys Qazaqstan ulttyq quramasy men Qyrǵyzstan ulttyq quramasy arasyndaǵy fınaldyq saıysta órbidi. Tóreshiniń ysqyryǵynan keıin alańǵa lap qoıǵan shabandozdar «ne bel, ne belbeý ketedi» dep shyqqanyn á degennen áıgiledi. Ulttyq quramanyń úzdigi Ernar Álimbaı alǵashqy mınýtta-aq aǵyzyp kelip serkeni ilip áketti de, arǵymaǵymen quıyndap kelip esep ashqan. Biraq Manas Nııazovtaı tegeýrindi kókparshysy bar qyrǵyz quramasy dereý es jıyp, tarazy basyn teńestirdi. 6-mınýtta Qubanyshbek Shoqanuly kezekti salymdy enshisine jazdy. Osydan keıin-aq olardyń oıyny júrdi. Tipti 1-taımda 1:3 esebimen alǵa da shyǵyp aldy. Abylaıhan Nyshanbekov jerdegi serkeni ilip alyp taqymyna basty da qarsylastyń sheńberine qaraı quıyndaı aǵyza jóneldi.
Esep aıyrmasyn qysqartýdyń oraıly sáti týǵan edi, biraq qyrǵyz quramasynyń qorǵanysyndaǵy oıynshylardyń attarynyń estiligi sondaı, ıesiniń oıyn aıtqyzbaı uǵatyndaı kórindi. Janymyzǵa jaıǵasqan qyrǵyzstandyq áriptesimiz «biz attardy kókpardy namys úshin shabýǵa úıretemiz» dep maqtanyp ta qoıdy. Áliptiń artyn baǵyp, áli 2-taım bar ekenin eskertip sabasyna túsirdik.
Ulttyq quramanyń bas bapkeri Aqylbaı Mankeev bastaǵan, aǵa jattyqtyrýshy Nurdáýlet Momynov qostaǵan mamandar úziliste qaıraý sózin qadap aıtyp, namys dodaǵa túsken shaqta jaı otyndaı jasyn oınatý qajettigin jetesine jetkize zerdesine quısa kerek, 2-taımdy sańlaqtarymyz shıraq bastady. Tasqamal qorǵanysty buzyp-jaryp aıqyn basymdyqpen alǵa shyqqan qarsylastarynyń jeńisti erte toılaýyna mursat bergen joq. Tarazy basyn teńestirip qoımaı, tipti 4:3 esebimen alǵa shyqqan. Oıynnyń negizgi ýaqyty túgesilýine 30 sekýnd qalǵan edi. Qursaǵyna bitken sharanasyna qundaǵyna ul bolyp oralsa, ómirge ýlaqshy (kókparshy) keldi dep qýanatyn qyrǵyz oıynshylary jankeshtiniń ózi eken. Tarazy basyn teńestirip ketti.
Osylaısha, Dúnıejúzilik kóshpeliler oıyndarynyń kókpardan chempıondyq ataǵy qosymsha 10 mınýttyq ýaqytta anyqtaldy. Iаǵnı osy ýaqyt ishinde qaı komanda birinshi salym salady, sol jeńiske jetedi. Qazaq sportynyń baǵyna týǵan Qurmanbek Turǵanbek mıdaı aralasqan dodanyń ortasynan serkeni sýyryp áketti de, qyrǵyz quramasynyń qorǵanysyn buzyp-jara jeńis salymyn saldy. Qazaqstan quramasy – kókpardan etnosport Olımpıadasynyń chempıony!
Eki jyl buryn Túrkııada ótken kóshpeliler alamanynda kókpardan fınaldyq tartys Qazaqstan men Qyrǵyzstan quramalary arasynda ótip sańlaqtarymyz chempıon atanǵan bolatyn. Bul joly da sol bıiginen kórindi. Ulttyq quramanyń bas bapkeri laýazymyna kóktemde taǵaıyndalǵan Aqylbaı Mankeev shákirtteriniń jeńiske jetýde aıanyp qalmaǵanyna razylyǵyn bildirdi.
«Biz o bastan-aq basty qarsylas qyrǵyz kókparshylary bolatynyn aıttyq. Sebebi bul elde kókpar oıynynan komanda arasyndaǵy saıys jylyna birneshe márte uıymdastyrylady. Jastar quramasy da, eresekter komandasy da óte tegeýrindi. Attary da ábden beıimdelgen. Fınaldyq saıys asa tartysty ótti. Tipti bizdiń jigitter 4:3 esebimen alda turǵanda qorǵanysymyz syr berdi. Biraq qosymsha ýaqytta jigitter namysqa basty. Barsha qoldaýǵa kelgen jankúıerlerge alǵysymyz sheksiz», dedi bas bapker.
Jeńis salymyn salǵan Qurmanbek Turǵanbek fınaldyq saıysqa tek jeńis úshin shyqqanyn aıtty. «Eki márte salymdy bolǵanyma qýanyshtymyn. Árıne, jeńiske jetýge sebepker bolǵan salym meniń enshime jazylǵany zor mártebe. Qyrǵyzstan quramasynyń múshelerin kókpardan kúmis júlde alýymen quttyqtaımyn. Bul eki elge de ortaq ulttyq oıyn. Jeńis birde olarǵa aýsa, birde bizdiń qanjyǵamyzǵa baılanady», dedi kókparshy.
Kókpardan V Dúnıejúzilik kóshpeliler oıyndarynyń chempıony atanǵan ulttyq qurama músheleri 10 mıllıon teńge syıaqyǵa kenelse, kúmis medal enshilegen Qyrǵyzstan quramasyna 6 mıllıon, qola júldeger atanǵan Reseı kókparshylary 4 mıllıon teńge berildi. Kókpar saıysynyń úzdik oıynshysy atanǵan Manas Nııazov 2 mıllıon teńge syıaqy aldy.
