Toptyq kezeńde qarsylastaryn aıqyn utqan elimizdiń ulttyq quramasy Qyrǵyzstan quramasyna ese jiberip, kúmis medaldi mise tutty. Úsh taımdyq saıysqa qyrǵyz kókparshylary 4:10 esebimen jeńiske jetti.
Saıys á degennen qyrǵyz kókparshylarynyń basymdyǵymen ótti. Oǵan negiz de joq emes. О́ıtkeni elimizde qazandyqqa kókpar tartý toqtaǵaly kóp jyldyń júzi boldy. Kókparshyǵa da, astyndaǵy atyna da qater tóndirip, jıi arandap qalý qaýpi de joǵary bolǵandyqtan qazandyqqa tartýǵa doǵarylǵan. Sol sebepti qazandyqqa emes, jerdegi sheńberge salym salý keń óris aldy. Al Qyrǵyzstanda, kerisinshe, jyl saıyn ótetin kókbóri dodasy tek qazandyqqa tartylady. Oǵan attary da ábden kóndigip, úırenip alǵan.
Aqylbaı Mankeev baptaıtyn kókbóriden ulttyq qurama múshelerin qyrǵyz qarsylastarynan oısyraı jeńildi dep júndeı bergen de jón bolmas. Qalyń jankúıer kýá, bizdiń jigitter mingen attardyń qazandyqtan úrkip, janyna jýymaı syrt aınalýy da salym salýǵa kedergisin keltirdi. Mysaly, tájirıbeli kókparshy Temirhan Aıtbaev tizgindegen «Alǵa» sáıgúlik Qyrǵyzstan quramasynyń qazandyǵyna jeke-dara kelgende toqtamaı óte shyqty. Al qyrǵyz komandasynyń qaı aty bolsyn qazandyqqa jetkende ıesine bolysyp kilt toqtaı qalady. Muny bir deńiz. Ekinshi taǵy osy Temirhannyń astyndaǵy arǵymaq dodanyń ishindegi arpalysta qarsylastyń aty omyraýlap kelip qaqqanda bir emes, eki ret omaqasyp qulady. Demek bizdiń kókpar attary dál osy kókbóri saıysynyń yrǵaǵyna áli de ilese almaı turǵanyn aıǵaqtaıdy. Taǵy bir sebep – kókbóriniń negizgi kóziri sanalatyn jekpe-jek dodasyna da salatyn sáıgúligimizdiń joqtyǵy. Al qarsy jaqtyń qaı atyn jekpe-jekke salsa da súringen joq. Osydan keıin de qyrǵyz kókparshylar jerdegi serkeni erkin ilip áketip salym sanyn eselep otyrdy.
Kókbóri dodasynan buıyrǵan kúmis medal da az tabys emes. Biraq 2026 jyly Qyrǵyzstanda ótetin kezekti Dúnıejúzilik kóshpeliler oıyndarynda olarǵa tótep berý úshin qazandyqqa tartatyn kókbórini qalaıda damytpasqa bolmaıdy.
