Foto: Astana ákimdigi
«Aspan» sport kesheninde ótken is-sharany Kóshpelilerdiń asyq sporty Halyqaralyq federasııasy men «Asyq atý» respýblıkalyq federasııasy Astana qalasy ákimdiginiń qoldaýymen uıymdastyryp otyr.
«Qurmetti qatysýshylar men qonaqtar. Búgin asyq atýdan birinshi álem chempıonaty bolyp jatyr. Ol qazaq jerinde ótip jatqany jaıdan-jaı emes. Qatysyp jatqan barsha adamǵa alǵysym sheksiz. Sizderge sáttilik tileı otyryp, búgingi jarysty ashyq dep jarııalaımyn», dedi Májilis depýtaty, Kóshpelilerdiń asyq sporty Halyqaralyq federasııasynyń prezıdenti Oljas Quspekov.
Uıymdastyrýshylardyń aıtýynsha, atalmysh chempıonat qazaq halqynyń ulttyq dástúrleri men mádenıetin álemdik arenada ilgeriletýdegi mańyzdy qadamdardyń biri bolmaq.
«Búgin - tarıhı kún. Sebebi elordada asyq atýdan tuńǵysh álem chempıonaty ótip jatyr. Asyq atý - bul qazaq halqynyń dástúrli oıyny. Oıyn eptilikke, mergendikke, shapshańdyqqa, sergektikke baýlıdy. Bir sózben aıtqanda, bul oıynnyń paıdasy mol», dedi Asyq atý federasııasynyń atqarýshy dırektory Azamat Manapov.
Chempıonattyń ashylý rásiminde qatysýshylar men kórermenderge áserli konserttik baǵdarlamalar, ulttyq mýzykalyq jáne bı qoıylymdary uıymdastyryldy. Sondaı-aq jınalǵandar asyq atý oıyny týraly jan-jaqty aqparat alyp, onyń qyr-syrymen tanysty.
Aıta keteıik, sporttyq jarysqa Qazaqstan, AQSh, Grýzııa, Vengrııa, Reseı Federasııasy, Rýmynııa, Mońǵolııa, Tájikstan, Túrkııa, Ispanııa, Chehııa, Úndistan, О́zbekstan syndy elderdiń úzdik sportshylary keldi.
Jeńimpazdar aqshalaı syılyq pen kýboktarmen marapattalady.
