Kóshpeliler kúresiniń qaı túrin alyp qarasaq ta, bilek kúshimen qatar, aıla-tásili artyq sportshy jeńiske jetedi. Túrik halqynyń ulttyq oıyndarynyń biri – «ashyrtmaly aba gıýresh»-ine (Ulttyq belbeý kúresi) de qara kúshpen birge eptilik, aqyl-aıla kerek. Beldesýler tegis shópti alańda ótedi. Sporttyń osy túrinen alańǵa shyqqan 5 balýanymyzdyń úsheýi fınalǵa deıin súrinbeı jetti. Alaıda altyn júlde sarapqa salynǵan beldesýlerde otandastarymyz qarsylastaryna jol berip qoıdy. Qorjynda – 3 kúmis. Kúmispen kúptelgen sportshylardyń arasynda 60 kg salmaqta beldesken Ernur Súleımen, 70 kg-da synǵa túsken Ádilet Ahmetǵalı, 90 kg-da óner kórsetken Aıdos Ǵalymov syndy myqtylar boldy.
Tartysty beldesýlerden keıin Ádilet Ahmetqalı qalyń kópshilikke tańsyq sporttyń erekshelikteri týraly az-kem áńgimelep, óziniń daıyndyǵy týraly aıtyp berdi.
– «Ashyrtmaly aba gıýresh»-iniń basqa kúres túrlerinen aıyrmashylyǵy bar. Erejeleri de erekshe. Árıne Túrkııanyń ulttyq oıyndarynyń biri bolǵan soń, túrikter bul sporttan myqty. О́zbekstan sportshylary da jaqsy daıyndaǵan. Negizi ózim dzıýdomen aınalysamyn. Sporttyń sol túrimen kásibı aınalysqanyma 10 jylǵa jýyqtady. Túrik kúresinen altyn medal alýǵa barymdy saldym. Qalaı degende de kóshpeliler oıyny óz elimizde ótip jatqan soń, jankúıerlerdi qýantqym keldi. Alaıda túrik qarsylasym basym boldy. Bir jaǵy «ashyrtmaly aba gıýresh»-inen alǵash baq synap turmyn. Áli alda talaı dodalarda jeńiske jetemin dep úmittenemin, – deıdi Ádilet Ahmetqalı.
Bul rette «ashyrtmaly aba gıýresh»-inen 19 memleketten 74 sportshy baq synaǵanyn jáne olardyń qaı-qaısysy da osal balýan bolmaǵanyn aıta ketken jón. Mysaly, Ernur Súleımen jartylaı fınaldyq kezeńde ózbekstandyq Mýzaferbek Nýrlaevtan basym tússe, fınalda Qyrǵyzstan sportshysy Roman Saparovtan jeńildi. Bul Ernurdyń V Dúnıejúzilik kóshpeliler oıyndarynda jeńip alǵan ekinshi kúmis júldesi. Otandasymyz osyǵan deıin «Alaý» saraıynda ózbek halqynyń ulttyq oıyny kýrash sportynan da synǵa túsip, ekinshi oryn oljalaǵan edi.
– Dúnıejúzilik kóshpeliler oıynyna daıyndyǵymyz jaqsy boldy. Barymyzdy salyp, altyn júlde alýǵa talpyndyq. Baq janbady. «Kýrash»-pen aınalysyp júrgenime eki jylǵa jýyqtady. Buǵan deıin ózbek balýanyna Azııa chempıonatynda ese jibergen edim. О́kinishke qaraı, bul joly da jeńildim. Aldaǵy álem birinshilikterinde, Azııa chempıonattarynda sporttyń osy túrinen altyn júlde alamyz degen senim bar. Árıne ol úshin daıyndyqty údetip, taǵy da shyńdalý qajet, – dep pikir bildirdi Ernur Súleımen.
Kýrashqa 27 memleketten 106 sportshy qatysýǵa nıet bildirgen. Sporttyń osy túri boıynsha erler arasynda bes salmaqta, áıelder arasynda úsh salmaqta myqtylar anyqtaldy. Munda el atynan óner kórsetken 7 balýan jartylaı fınalǵa joldama alyp, júldegerler qataryna qosylǵan edi. Aqtyq synǵa 4 balýan joldama alǵanda da keminde birer altyn buıyrar degen úmit basym boldy. О́kinishke qaraı, ekinshi jarys kúninde altyn júlde sportshylardyń ýysynan sýsyp ketti. Osylaısha, kýrashtan baq synaǵan balýandar 4 kúmis, 3 qola júldemen jarysty aıaqtady. Júldegerlerdiń ishinde Ernur Súleımennen bólek, Marat Nyǵmatýllaev, Aıbek Qazaqbaev, Tolǵanaı Ábeýova, Altynaı Nurhanova, Nurdin Shaımerden, Ádilet Ahmetqalı syndy balýandar boldy.
Abyroı bolǵanda, tatar halqynyń kóne ulttyq belbeý kúresi kóráshten altyn júlde buıyrdy. Beldesýler Jaqsylyq Úshkempirov atyndaǵy jekpe-jek saraıynda ótti. Jarys qorytyndysy boıynsha tórt salmaqta myqtylar anyqtaldy. Bul synda 90 kg salmaqta beldesken Birjan Shaımerdenov altyn júlde alyp, el mereıin asyrdy. Kúmis júldege ıe bolǵan Ádilet Shalǵynbekuly (64 kg) men Nurdáýlet Jarylǵapov (+100 kg) pen qola medal alǵan Beknur Bektaılar da (75 kg) sylbyr kúrespedi, baryn saldy.
