Sharaına
Grekııada merziminen buryn ótken parlament saılaýy boıynsha daýys sanaý aıaqtalyp keledi. Onda basty oppozısııalyq Radıkaldy solshyl kúshter koalısııasy (SIRIZA) jeńiske jetken bolatyn.
Oǵan qarsylastarynan aıtarlyqtaı uzap ketýdiń sáti tústi. Degenmen, bir másele túıindi kúıinde qalyp tur. Ol – SIRIZA derbes túrde Grekııa úkimetin quryp, óz zań jobalaryn negizgi zań shyǵarýshy organ arqyly ótkize ala ma degen másele. Afına jańalyqtar agenttigi ol bıýlletenderdi 100 paıyz sanap shyqqannan keıin ǵana belgili bolady degendi aıtýda. Úkimet qurý úshin SIRIZA parlamentte basym orynǵa ıe bolýy kerek, ıaǵnı 300 mandattyń 151-i bularǵa tıesili bolýy tıis.
Qaza bolǵanyn rastady
Radıkaldy «Islam memleketi» tobynyń sodyrlary ınternet arqyly habar taratatyn óz radıostansalarynda kepilge alynǵan eki japonııalyqtyń biriniń óltirilgenin rastady.
Japonııa azamatynyń óltirilgeni týraly áńgime nebári 38 sekýnd qana júrgen. Biraq osyndaı qatań jazalaýdyń sebepteri de, bolǵan oqıǵanyń egjeı-tegjeıi de aıtylmaǵan kórinedi. «Islam memleketi» óz aıtqanyn oryndady. Uıym sodyrlary belgilengen merzimniń ótip ketýine baılanysty tutqyndy o dúnıege attandyrdy, delingen radıo arqyly taratylǵan habarda. Buǵan deıin olar 200 mıllıon dollar tólemaqy tólemegen jaǵdaıda japonııalyq kepilderdiń óltiriletinin habarlaǵan bolatyn.
Nıý-Iork kúshti daýylǵa daıyndalýda
AQSh-tyń soltústik-shyǵysyna óte kúshti qarly boran jaqyndap keledi. Aýa raıyn boljaýshylar taıaýdaǵy eki kúnniń ishinde keıbir aýdandarda 1,5 metrge deıin qar túsetindigin aıtýda.
Nıý-Iork qalasynyń meri Bıll de Blazıo daýyldyń qala tarıhyndaǵy eń kúshti daýyl bolyp shyǵýy múmkin ekenin aıtyp, eskertý jasaýda. Qala basshysy jergilikti turǵyndardy saq bolýǵa, jeke avtokólikti paıdalanbaýǵa shaqyryp, asa qajet bolmasa, kóshelerge shyqpaýǵa keńes berýde. Daýyl Nıý-Iork, Nıý-Djersı, Konnektıkýt, Pensılvanııa, Massachýsets jáne Men shtattaryn qamtıdy dep kútilýde. Meteorologtardyń boljamynsha, sıklonnyń beti tek 27 qańtar kúni keshkisin ǵana qaıtpaq.
Egıpette taǵy da qaqtyǵys
Egıpette «25 qańtardaǵy revolıýsııanyń» tórt jyldyǵynda 15 adam qaza taýyp, 40-qa tarta adam zardap shekti. Bul týraly Egıpet Arab Respýblıkasynyń densaýlyq saqtaý mınıstrligi habarlaǵan.
Osy atalǵan vedomstvonyń málimetterine qaraǵanda, 9 adam Kaırdiń shet jaǵynda bolǵan qandy qaqtyǵysta qaza tapqan. Qaza bolǵandardyń qatarynda áskerı qyzmetshi men bir bala bar kórinedi. Onyń syrtynda prezıdent Abdel Fattah As-Sısıdiń jaqtastary men qarsylastary arasynda da qaqtyǵys oryn alǵan. Munda osynyń aldynda qaza tapqan sosıalıstik partııanyń belsendisi Shaıma as-Sabbagtyń jaqyndary men áriptesteri jınalǵan. Olar ereýilshilerge qarsy qarý qoldandy dep polısııany aıyptaýda.
Qoryqqanǵa qos kóriner
Úndistanda polısııa AQSh prezıdenti Barak Obamanyń saparyna baılanysty qaýipsizdik sharalaryn kúsheıte otyryp, eki reseılik stýdentti ustaǵan.
Oqıǵa Orıssa shtatyndaǵy Nıalı derevnıasynda oryn alǵan. Úlken rıýkzaktary bar eki jas jigittiń jol boıynda avtokólik kútip turǵandaryn kórgen jergilikti turǵyndar polısııa shaqyrǵan. Sóıtip, olardy ustap, Pýrı qalasyndaǵy polısııa ýchaskesine jetkizgen. Jergilikti polısııa bastyǵynyń habarlaýynsha, eki jigittiń Ijev memlekettik tehnologııalyq ınstıtýtynyń stýdentteri ekeni, tıisti qujattarynyń jáne úsh aılyq týrıstik vızalarynyń, sol sııaqty sheteldik pasporttary men avıabıletteriniń bar ekeni anyqtalǵan. Olar, tipti, Obamanyń sapary týraly múlde bilmeıtin bolyp shyqqan.
Sarapshylar sanksııany qoldamaıdy
Jaqynda ǵana aıaqtalǵan Davos ekonomıkalyq forýmyna qatysqan birqatar sarapshylar Reseı men Eýropa odaǵynyń bir-birine qarsy engizgen sanksııalaryna qarsy shyqty.
Olardyń aıtýlaryna qaraǵanda, sanksııalar ekonomıkanyń jáne qarapaıym adamdardyń ómirine keri áserin tıgizetin tıimsiz qural bolyp tabylady. Sanksııalar olar baǵyttalǵandardan góri ózgelerge qattyraq tıedi, dep málimdegen Horasis uıymynyń prezıdenti Frank-Iýrgen Rıhter. Biz ózimizdiń ınvestısııalyq qyzmetimizden bas tartpaýǵa tıispiz, óıtkeni, Reseı Batysty qajet etedi, al Batys bolsa Reseıge odan beter muqtaj, dep atap kórsetken ol BAQ-qa bergen suhbatynda.
Alty adam qar kóshkininen qaza tapty
Alpi taýlarynda qar kóshkininen keıin alty fransýzdyq taý shańǵyshylarynyń deneleri tabylǵan. Olardyń tórteýi – erkek, ekeýi áıel kórinedi. Bul týraly Gap qalasynyń prefektýrasy habarlaǵan.
Oqıǵa ótken senbi kúni fransýzdyń Joǵarǵy Alpi departamentine qaraıtyn Keıra taýly aýdanynda oryn alǵan. Alty tájirıbeli taý shańǵyshylarynan turatyn top tańerteń taý basyna shyǵyp, tús qaıta bazaǵa oralýǵa tıis bolǵan. Biraq olar sol kúıi habar-osharsyz ketken. Osydan keıin joǵalǵan adamdardy izdestirýge tikushaq jiberilgen. Aıta ketý kerek, taý shańǵysy maýsymy bastalǵaly beri fransýzdyq Alpide qar kóshkini saldarynan 11 adam qaza taýyp otyr.
Internet materıaldary negizinde ázirlendi.
