Áıelder arasyndaǵy dodada Ǵalııa Tynbaeva fınalǵa deıingi qarsylastaryn aıqyn utty. Italııalyq Djýlııa Gıglıone, fransýz Anaıs Perrot, majarlyq Rebeka Rıta Koszegıdi jyǵyp, altyn medal úshin kúreste japon qyzy Koga Ýakanaǵa ese jiberdi.
Erler dodasynda 60 kg salmaqta beldesýge shyqqan Sherzod Davlatov ta elimizdiń ánuranyn shyrqatty. Irikteý kezeńinde aldymen ızraıldik Arıel Shýlmandy aıqyn basymdyqpen utyp, ekinshi kezeńde majarlyq Davıd Nadjıdi jeńdi. Ýkraınalyq Artıom Lesıýkti qapy qaldyryp, jartylaı fınalǵa shyqqan. Sherzodtyń qarymyna fransýz Enso Djın da tótep bere alǵan joq. Altyn medal úshin ótken beldesýde ázerbaıjandyq Ahmad Iýsýfovtan basym tústi.
Janarys Rahmetqalı (66 kg) fınaldyq beldeýde ulybrıtanııalyq Maıkl Fraıerdi jyqty. Irikteý kezeńinde aldymen Horvatııa balýany Nıkola Zorotovıchti utyp, shırek fınaldyq tartysta salvadorlyq Dıego Kalısten ıpponmen basym túsip, jartylaı fınalda grýzın Tengo Zırakashvılıdi jeńdi. Jastar arasynda jarqyrap kórinip, byltyr Portýgalııanyń Odıvelash qalasynda ótken álem chempıonatynda qola júlde ıelenip, álem kýboginiń jeńimpazy atanǵan edi. Endi, mine, eresekter qataryna ótken balýan jasyndaı jarqyrap, Gran-prı serııasynyń altynyn oljalady.
Kúres: Rızabek álem chempıonatyna qatysa ma?
Erkin kúresten eresekter arasynda tuńǵysh álem chempıony atanǵan Rızabek Aıtmuhan jýyrda Ispanııanyń Pontevedra qalasynda 20 jasqa deıingi balýandar arasynda ótken álem birinshiliginde de top jardy.
Byltyr Serbııanyń Belgrad qalasy qabyldaǵan álem chempıonatyna olımpıadalyq salmaq sanalmaıtyn 92 kg-da altyn medal alǵan jerlesimiz bıyl 97 (olımpıadalyq salmaqqa) túbegeıli aýysty. Sóıtti de óziniń áleýetin Ispanııada synap kórýge bel býdy. Talantty balýan babynda eken, birinshi beldesýinde Iran eliniń úmit artqan sańlaǵy Abolfaza Babalýdy 12:1 esebimen aıqyn utty. Shırek fınaldyq beldesýde grek Nıkolaos Karavanosty da dál osyndaı eseppen jyqty. Jartylaı fınalda amerıkalyq Djastın Rademahermen beldesýinde 9:1 esebi tirkelse, fınalda ázerbaıjandyq Hetag Karsanovty 10:0 nátıjesimen aıqyn utyp, 20 jasqa deıingiler arasynda álem chempıony atandy. Jastar quramasynyń aǵa bapkeri Aslan Baıǵulov Rızabektiń qarsylastary osal bolmaǵanyn, barlyǵyn da aıqyn basymdyqpen utýy jerlesimizdiń tynymsyz ter tógip, ázirlikti kúsheıtýiniń nátıjesi ekenin aıtady.
Rızabek Aıtmuhannyń ákesi ári jeke bapkeri Qanat Joldasbaı 21-27 qazan aralyǵynda Albanııanyń Tırana qalasynda 23 jasqa deıingi balýandar arasynda ótetin álem chempıonatyna qatysatynyn jetkizdi. «Ispanııada ótken álem birinshiligi bizdiń deńgeıimizdiń qanshalyqty ekenin áıgilep berdi. Rızabek olımpıadalyq salmaqqa túpkilikti úırenisti. Alǵashynda jańa salmaqqa boıymyzdy úıretkenshe bir jyl ýaqytymyzdy sarp etemiz be dep te ýaıymdadyq. Rızabek alty aıda babyna endi», dedi Q.Joldasbaı.
Boks: Jańa tolqyn keledi
Bokstan jasóspirimder arasyndaǵy Azııa chempıonaty Birikken Arab Ámirliginiń ál- Aın qalasynda ótti. Qurlyqtyń 26 elinen 462 boksshy jıylǵan dodada boksshylarymyz tolaıym tabysqa kenelip, jalpy komandalyq esepte kósh basynan kórinse, О́zbekstan boksshylary ekinshi, Úndistan quramasy úshinshi satyǵa turaqtady.
2010, 2011 jyly týǵan jasóspirimder synynda (qyzdar arasynda) Nuraıym Qudaıbergen (49 kg), Aılın Qojamberdıeva (58 kg), Aıaýlym Ospanova (61 kg), Dıana Nadyrbek (70 kg) chempıon atansa, Ásel Jálimbekova (35 kg), Lashyn Dáýletjan (46 kg), Arına Orazymbet (52 kg), Balym Ǵabıtqyzy (55 kg), Madına Nurmanova (64 kg), Káýsar Saǵymbaı (+70 kg) fınaldyq jekpe-jekte súrinip, kúmis medaldy mise tutty. Azııa chempıonatynyń jartylaı fınaldyq synynda súringen Ánel Ordabek (33 kg), Tahmına Almasbek (37 kg), Mılana Inshına (40 kg), Arýjan Tillábaı (43 kg), Qymbat Ǵabıdolla (67 kg) qola júldemen oraldy.
Uldar saıysynda (2010, 2011 jyly týǵandar) Abylaı Dosymbekov (35 kg), Bekhan Orazbaev (40 kg), Jumaǵalı Nurmuhan (43 kg), Ámir Muhıt (46 kg), Nurıslam Ońalbek (52 kg), Ábdimansur Jaqsylyq (55 kg), Tórehan Qanatbaı (64 kg), Mansur Amantaı (70 kg) Azııa birinshiliginde jeńiske jetti. 61 kg salmaqta judyryqtasqan Álıımran Álıevke kúmis medal buıyrsa, Álı Ábdikamal (33 kg) men Jádiger Músiráli (+70 kg) qola júldeni mise tutty.
Al 2008, 2009 jylǵy jasóspirimder dodasyna qatysqan qyzdarymyzǵa 1 altyn, 4 kúmis, 6 qola medal buıyrdy. 63 kg salmaqta rıngte jasyn oınatqan Alına Qudaıgenovanyń qarymyna eshkim shydas bergen joq. Sheberligin pash etken Alına Qudaıgenova Azııa chempıonatynyń úzdik boksshysy ataǵyn qosa ıelendi. Aıym Tańqybaeva (48 kg), Sofııa Vashenko (60 kg), Zarına Tolybaı (75 kg), Sabına Jaqsylyq (+80 kg) kúmis, Madıra Jumahan (46 kg), Jámıla Bolatbekqyzy (52 kg), Aıǵanym Qadyrhan (57 kg), Aısulý Muhıt (66 kg), Kamıla Ospanova (70 kg), Aıdana Ubaıdullaqyzy (80 kg) qola medal ıelendi.
Uldar dodasynda Tımýr Taıbekov (75 kg), Erýbaı Turlybaı (80 kg) Azııa chempıony atansa, Aqjúrek Qalabaı (60 kg) men Vladıslav Samojonovqa (+80 kg) qola medal buıyrdy.
