Jany jomart azamat

Osydan jarty ǵasyr buryn 27 qańtarda Atyraý oblysynda munaıshy otbasynda dúnıege kelgen Damır Medınamov orta mektepti úzdik bitirgen soń, alǵashqy eńbek jolyn Maqat aýdandyq komsomol komıtetinde hatshy bolyp bastady. 1986-1988 jyldar aralyǵynda Keńes armııasy qatarynda júrip, ınter­nasıonaldyq boryshyn Aýǵan­standaǵy ot pen oqtyń arasynda atqarǵan bozbala jigit Damır erjúrektigi úshin «Qyzyl Juldyz» ordenin  aldy. Burynǵy KSRO elderine taraıtyn áskerı gazetterde qazaqstandyq soldat Damır týraly maqalalar jarııalanyp,  onyń batyldyǵy men áskerı sheberligi ma­daqtaldy. Ol 1989 jyly sol kezdegi Qazaq­standaǵy eń tańdaýly joǵary oqý orny bolyp sanalatyn S.M.Kırov atyndaǵy Qazaq memlekettik ýnıversıtetiniń fılologııa fakýltetine oqýǵa túsip, qazaq tili men ádebıeti pániniń  oqytý­shysy mamandyǵyn alyp shyǵady. Ýnıversıtetti bitirgen 1995 jyly Qazaq­stan Respýblıkasynyń Baspasóz jáne buqaralyq aqparat isteri jónindegi ulttyq agenttigine qyzmetke ornalasady. Mine, sodan beri tabany kúrekteı jıyrma jyl boıy keıinnen mınıstrlik bolyp ózgergen osy organnyń buqaralyq aqparat quraldary  salasyndaǵy qurylymdyq bólimshesinde qyzmet atqaryp keledi. 1997 jylǵy maýsym aıynda agenttiktiń quramynda Damır Medı­namov  jańa astana – Aqmola qalasyna kóship keldi. Árıne, bul aıtýǵa ǵana ońaı dúnıe bolatyn. Qalǵan 11 áriptesi Aqmolaǵa poıyzben kelip jatqanda, jasy 30-dan jańa asqan jigittiń agenttiktiń búkil dúnıesin bir ózi júk kóligimen Astanaǵa ákelýi ońaıǵa túspedi. Onyń qolynan kelmeıtin isi joǵyn, «segiz qyrly, bir syrly» ekenin, qashan da kómekke ázir turatynyn qyzmetkerlerden san ret estidim. Sol 1997 jyly agenttiktiń búkil ǵımaratyna elektr symdaryn júrgizip, barlyq tehnıkasyn iske qosyp, sharýashylyq máselelerimen de Damır aınalysty. Damırdiń adamdyq, azamattyq qasıet­teri jóninde kóp aıtýǵa bolady. Oǵan ózim de san ret kýá boldym. Mınıstrlikte jumys isteıtin qyzmetkerlerdiń basym kópshiligi jastar bolǵandyqtan, olardyń máselelerin sheshýge de Damır kómektesetin. Eńbekte de erinbeı-jalyqpaı, izdenip jumys atqaratyn Damır Medınamov talaı jasqa tálimger de bolyp, tálimdi tárbıe berdi. Osyndaı ıgi isteri, jaqsy eńbegi, kásibı biliktiligi laıyqty baǵalanyp «Qazaqstan Respýb­lıkasynyń mádenıet qaıratkeri» ataǵymen, «Astana qalasyna – 10 jyl» medalimen jáne maqtaý gramotasymen atalyp ótti. Búgingi tańda jigit aǵasy Damır zaıyby Gúlbarjan ekeýi eki ul ósirip, úlkeni Baýyr­jandy úılendirip, nemere súıip otyr. О́zimiz de otbasymyzben 2007 jylǵy sáýir aıynda Astana qalasyna Mádenıet jáne aqparat mınıstrligine qyzmetke aýysyp kelgeli beri, Medınamovtar otbasymen jaqsy aralasyp kettik. Oǵan da dáneker bolǵan Damır edi.  Astana bolǵandyqtan, páter máselesi qıyn ekeni barshaǵa málim. 2008 jylǵy aqpan aıynda páterden-páterge otbasymyzben kóship-qonyp júrgenimizde, Damır men Gúlbarjan ekeýi Abaı kóshesindegi úıdegi  3 bólmeli páterine bizdi turǵyzdy. Jolymyz bolyp sol jylǵy tamyz aıynda biz de 3 bólmeli páterge qol jet­kizdik. Jasym jer ortasyna jetip, qınalǵan sátte qol ushyn sozǵan Damırdiń azamattyǵyna ábden tántimin. Qazir Damır men Gúlbarjannyń nemeresi Dııardyń kindik sheshesimin. Iá, osy otbasynyń búkil aǵaıyn-týǵany, quda-jegjaty bizdiń de týystarymyz bolyp ketti. Naǵyz jany jomart azamat, mine, osyndaı bolsa kerek-ti! Gúlmahıra NURBEKQYZY. ASTANA.