О́kpelep, óz ómirin qııýǵa bola ma?

Qostanaı oblysynda  ótken jyly jasóspirim­derdiń ózine qol jumsaýy 10 paıyzǵa kóbeıgen. Respýblıkalyq Bas prokýratýranyń quqyqtyq statıstıka jáne arnaıy esepke alý jónindegi komıteti oblystyq  basqarmasynyń bastyǵy Evgenıı Parhomenkonyń málimetinshe, ótken jyly oblys óńirinde jasóspirimderdiń 65  ózine qol jumsaý áreketi tirkelgen.  Onyń 11-i qaıtys boldy,  54 bala ómirin ózi qııýǵa árekettengen.  Al 2013 jyly  59 jasóspirim jasaǵan teris árekettiń 15-i sýısıdpen aıaqtalǵan edi. – Balalardyń ózine qol jumsaýynyń bas­ty sebebi – otbasyndaǵy urys-keris, óziniń jaq­sy kóretin adamymen urysyp qalý, kúrdeli áleý­met­tik-psıhologııalyq  jaǵdaı. Balanyń sýısıd­ke barýyna otbasynyń materıaldyq jaǵdaıy emes,  balalar men eresekter arasyndaǵy túsinis­tik­tiń joqtyǵy sebep bolady. 2013 jáne 2014 jyl­dary ózine qol jumsaýǵa áreket etken, sýısıd­ke barǵandar negizinen 15-17 jastaǵy jasóspirimder. Bul jasta olarda negizinen  psıhologııalyq turaqsyq minez, kóńil kúı kúshti bolady, – deıdi Qazaqstan Respýblıkasy Bas prokýratýrasynyń  Quqyqtyq statıstıka jáne arnaıy esepke alý komıteti  Qostanaı oblystyq basqarmasynyń  bastyǵy Evgenıı Parhomenko. Statıstıkaǵa júgingen mamandardyń aıtýyna qaraǵanda,  qyzdar ózine qol jumsaýǵa jıi árekettenedi, biraq  uldar oıyna alǵan nárseni  aıaǵyna deıin jetkizedi.  2013 jyly  oblys óńirinde 37 qyz bala, 22 ul bala, 2014 jyly 49 qyz bala, 16 ul ózin ólimge qııýǵa bel baılaǵan. 2014 jyly 49 qyzdyń 6-ynyń, ózine qol jumsaǵan 16 uldyń 5-iniń áreketi sýısıd­pen aıaqtalǵan. Osyndaı teris túsiniktegi jasós­pi­rimder aınalasyndaǵy jaqyn-jýyǵynyń ózine kóńil bólmeıtinin jıi aıtady.  О́tken jyly kóktemde tehnıkalyq kolledjdiń 17 jasar stýdenti Qarabalyq aýdanyndaǵy Qosoba aýylyndaǵy saraıda asylyp qalǵan. Sebebi, oǵan ata-anasynyń  meıirimi jetpegen kórinedi Názıra JÁRIMBETOVA, «Egemen Qazaqstan».