Foto: Úkimet
Kezdesýde kólik jáne logıstıka, AО́K, energetıka, týrızm, avıasııa ónerkásibi salalaryndaǵy ózara is-qımyl, sondaı-aq mádenı-gýmanıtarlyq baılanystardy nyǵaıtý máseleleri qaralǵan.
Aıta keteıik, Grýzııa – Qazaqstannyń Ońtústik Kavkazdaǵy mańyzdy ári senimdi seriktesi. Bıyl birinshi toqsanda grýzın ınvestorlary Qazaqstan ekonomıkasyna $88,5 mln ınvestısııa quıdy, jalpy 10 jyl ishinde ınvestısııa kólemi $500 mln-nan asqan.
Taraptar tranzıttik-kólik sektoryndaǵy perspektıvalarǵa nazar aýdardy. Eki eldiń aýmaǵy arqyly Eýropadan Qytaıǵa jáne Ońtústik-Shyǵys Azııaǵa aparatyn eń qysqa joldar – iri transkontınenttik kólik dálizderi ótedi.
«Qazaqstan men Grýzııa – Transkaspıı halyqaralyq kólik baǵytyn damytý aıasynda belsendi yntymaqtastyqta. Atalǵan baǵyt boıynsha júkterdi aýystyryp tıeý ótken jyly 65%-ǵa, bıylǵy 8 aıda 69%-ǵa ósip, 2,9 mln tonnaǵa jetti. Memleket basshysy Orta dálizdi damytýǵa úlken kóńil bólip otyr, biz bul baǵyt boıynsha tasymal kólemin 10 mln tonnaǵa deıin jetkizýdi kózdep otyrmyz. Ol úshin Úkimet tranzıt jaǵdaıyn jaqsartý boıynsha dáıekti sharalar qabyldaýda», dedi Oljas Bektenov.
QR Premer-Mınıstri básekege qabiletti tarıftik sharttardy belgileý, jetkizý merzimderin qysqartý jáne THKB boıynsha, onyń ishinde Baký – Tbılısı – Kars jelisi arqyly tasymaldaý kólemin ulǵaıtý jónindegi birlesken jumysty jalǵastyrýdyń mańyzdy ekenin basa aıtty. Sonymen qatar kólik dálizin belsendi túrde sıfrlandyrý qajettigi anyqtaldy, bul atalǵan baǵyttyń halyqaralyq tasymaldaýshylar úshin tartymdylyǵyn arttyrady.
О́z kezeginde Levan Davıtashvılı Qazaqstanmen yntymaqtastyqty nyǵaıtýǵa qyzyǵýshylyq tanytyp, bul rette ekijaqty qatynastardy damytýǵa jańa serpin berýge arnalǵan Úkimetaralyq komıssııanyń erekshe rólin atap ótti.
Kezdesýge qatysýshylar saýda-ekonomıkalyq áriptestiktiń qarqyndy damýyn qamtamasyz etý úshin kópjosparly jumysty jalǵastyrý nıetin rastady.
