Sýretti túsirgen – Dmıtrıı EROFEEV
Oblysta múgedektigi bar adamdardyń mekemelerge kirip-shyǵý múmkindigin qamtamasyz etý úshin 5 jylda myńnan astam nysannyń kireberisine beıimdeý jumystary júrgizildi. О́tken 2021–2023 jyldary áleýmettik ınfraqurylym nysandarynyń qoljetimdiligin qamtamasyz etý maqsatynda barlyǵy 460 nysan tekserildi. Sonyń nátıjesinde, nysandarǵa 2021 jyly 148, 2022 jyly 144, al 2023 jyly 168 pandýs qoıylǵan. Búginde aýdan, qalalardaǵy 168 nysannyń 63-ine júrgizilgen beıimdeý jumystary aıaqtaldy. Odan bólek, 17 nysanda beıimdeý jumysyn júrgizý úshin memlekettik satyp alý konkýrsy jarııalandy. Taǵy 2 nysanǵa kirip-shyǵý jolyn salý úshin konkýrs jarııalaýǵa qujattar ázirlenip jatyr.
«Oblys basshysy Beıbit Isabaevtyń tapsyrmasyna sáıkes óńirde múgedek jandar úshin áleýmettik ınfraqurylymdardy qoljetimdi etý baǵytynda keshendi jumys júrgizilip jatyr. Bıyl 168 áleýmettik ınfraqurylym nysany beıimdeldi, oǵan jergilikti bıýdjetten 591,8 mln teńge bólindi. Jol kartasy aıasynda barlyǵy 1 119 nysandy beıimdeý josparlansa, búgingi kúnge sonyń 628-i beıimdeldi. Qalǵan 491 nysanda bul jumystar kezeń-kezeńimen atqarylady. Osylaısha, 2027 jylǵa qaraı óńirdiń áleýmettik ınfraqurylym nysandaryn beıimdeý boıynsha josparlanǵan jumystardyń kólemi tolyǵymen aıaqtalady», deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ermek Mızambaev.
Budan bólek, Halyqty áleýmettik qorǵaý salasyndaǵy retteý jáne baqylaý komıteti Jetisý oblysy boıynsha departamentiniń mamandary múgedektigi bar azamattar úshin obektilerdiń qoljetimdiligin qamtamasyz etýdi memlekettik baqylaý sheńberinde bıyl óńirde 95 tekserý júrgizip, sonyń qorytyndysynda 70 sýbekt jalpy somasy 9,6 mln teńgeden astam ákimshilik jaýapqa tartyldy.
«Biz taldyqorǵandyq kásipkerler arasynda túsindirý jumystaryn júrgizip kelemiz. Saýda úıleriniń basshylaryna da jıi qulaqqaǵys etemiz. Máselen, «Shapaǵat» saýda úıiniń ekinshi qabatyna jáne «Zeta» dúkeniniń kireberisine eki kótergish ornatylǵanyn osyndaı jumystardyń oń nátıjesi deýge bolady, oǵan qosa pandýsy da bar. Endi baıaý qozǵalatyn jáne múgedekter arbasynda júretin adamdar saýda úıine qınalmaı kire alady. «Shapaǵat» saýda úıiniń basshylyǵyna osyndaı sharalardy qolǵa alǵany úshin alǵysymdy bildiremin. Saýda obektileri men ózge de mekemelerdiń quryltaıshylarynan múgedektigi jáne erekshe qajettilikteri bar jandardyń nysanǵa kirip-shyǵýyna qolaıly jaǵdaı jasaýdy suraımyz. Barsha azamattar úshin kedergisiz orta qurý – bizdiń ortaq mindetimiz», deıdi «ELSTAR» múgedekter qoǵamdyq birlestiginiń basshysy, Taldyqorǵan qalasy ákiminiń múgedekterdiń quqyqtary jónindegi keńesshisi, múgedek adamdardyń ınfraqurylymǵa qoljetimdilikti qamtamasyz etý jónindegi monıtorıng tobynyń múshesi Vadım Drýzın.
Sondaı-aq oblysta «Invataksı» qyzmeti jolǵa qoıylǵanyn atap ótken jón. Búgingi tańda osyndaı 34 arnaıy avtokólik bar, jyl basynan beri oblys boıynsha atalmysh kólik qyzmetine 60 myńnan astam ótinim kelip túsken.
Jalpy, óńirde qoljetimdilikti keshendi túrde qamtamasyz etýge jáne kedergisiz orta qurýǵa erekshe kóńil bólinedi. Bul rette jańa nysandardy salý kezinde merdiger uıymdarǵa qoljetimdi ortany qamtamasyz etý qaǵıdalaryn saqtaý boıynsha naqty talaptar qoıylady. «Qazaqstan Respýblıkasynda múgedekterdi áleýmettik qorǵaý týraly» Zańnyń 25-babynda kásipkerlik qyzmetti júzege asyratyn jeke tulǵalar, sondaı-aq zańdy tulǵalar ulttyq standarttarǵa sáıkes múgedekterdiń ortaq paıdalanylatyn kólik quraldaryna, turǵyn úılerge, qoǵamdyq jáne óndiristik úılerge, ǵımarattar men úı-jaılarǵa kedergisiz kirip-shyǵýyna, áýejaılarda, temirjol beketterinde, avtobeketter men turaqtarda, teńiz jáne ózen porttarynda erkin baǵdar ustanýy men júrip-turýyna jaǵdaı jasaýǵa mindettelgen.
Taǵdyr taýqymetin tartyp júrgen múmkindigi shekteýli jannyń aldynan kezdesetin másele az emes. Kedergisiz qozǵalys arqyly olardyń qajettiligine jaǵdaı jasaý – sol máselelerdiń ishindegi mańyzdysy. Soǵan saı bilim salasy boıynsha 94, densaýlyq saqtaý salasy boıynsha 37, okrýg ákimdikteri 18, sport salasy boıynsha 6, mádenıette 9, áleýmettik sala boıynsha 2 nysanǵa beıimdeý jumystary júrgizildi.
Jetisý oblysy
