Elbasy Nazarbaev Ýnıversıtetiniń túlekterine dıplom tapsyrdy

ASTANA. 15 maýsym. Memleket basshysy Astanadaǵy Nazarbaev Ýnıversıtetiniń alǵashqy túlekterine dıplom tapsyrý rásimine qatysty. Bul týraly «QazAqparat» habarlady. Saltanatty sharada Elbasy birneshe úzdik túlekke dıplomdaryn tabys etti. Sondaı-aq, Prezıdent otandyq kompanııalarǵa osy oqý ornynyń túlekterin jumysqa qabyldaýǵa shaqyrdy. «Qazir endi bolashaqtaryń óz qoldaryńda. Keıbiriń sheteldik ýnıversıtetterge barasyńdar, basqa bireýiń osynda qalasyńdar, qalǵandaryń halyqaralyq kompanııalarǵa jumysqa ornalasyp jatyrsyńdar. Biraq meniń aıtaıyn degenim, eń aldymen Otanǵa qyzmet etińder. Qazaqstannyń kompanııalary qazir sizderdiń aralaryńnan bilikti mamandardy alyp, elimizdiń ıgiligine jumys istetýi kerek. Qazaqstannyń órkendeýine qyzmet etý kereksińder. Otannyń bergenin on ese qaıtarýlaryń kerek. Solaı emes pe?», – dedi Memleket basshysy. Nazarbaev Ýnıversıteti 2010 jyly Elbasynyń bastamasymen quryldy. Atalǵan oqý ordasy otandyq bilim berýdiń úzdik úlgisi bolyp tabylady. Bıyl ýnıversıtetti 446 stýdent bitirdi. Elaman Qońyr. Derek: «QazAqparat». Sýret: liter.kz.