Dúnıege joǵarydaǵydaı kináratpen kelgen balaqaıǵa artyq saýsaǵy únemi kedergi keltirip, júrip-turýyn qıyndata túsken, sábıdiń sol aıaǵy oń aıaǵynan birneshe ólshemge úlken bolǵandyqtan, eki túrli aıaqkıim kıgen. Mamandar ýaqyt óte kele bul kinárat balanyń kóńil-kúıine de áser etip, psıhologııalyq kúızeliske dýshar etýi múmkin deıdi. Sondyqtan dárigerler hırýrgııalyq jolmen qutylý kerek degen sheshimge kelgen edi. Rasynda da, ósken saıyn qyz balanyń jaǵdaıy qıyndap, artyq bashpaıy aıaqkıimge syımaı qınala bastaǵan.
Bastapqyda baldyrǵannyń ata-anasy bul máseleni sheshýdiń joldaryn qarastyrǵanymen, operasııa jasatýǵa batyly barmaǵan eken. Qyz bala 10 jasqa tolyp, áke-sheshesi óz tanystary men dárigerleriniń keńesimen Almatydaǵy №2 Balalar qalalyq klınıkalyq aýrýhanasynyń hırýrgterine júgindi. Aýrýhana mamandary qaıta-qaıta keńese otyryp, tekserýlerden keıin qyz balany qalypty ómirge oraltyp, aıaqtaǵy anomalııalyq kemistikten qutylý úshin operasııa jasaý qajet degen qorytyndyǵa keldi.
Mundaı erekshe operasııa Almaty qalasyndaǵy №2 Balalar qalalyq klınıkalyq aýrýhanasy men «Meıirimdilik úıi» QQ uıymdastyrǵan arnaıy halyqaralyq sheberlik-dárisi sheńberinde qor seriktesteriniń demeýshiligimen atqaryldy. Biregeı operasııa barysynda Qazaqstan men Reseı elderiniń jetekshi balalar hırýrgteri birige qımyldap, jańa ádistemeler men tehnologııalar qoldandy.
«Mundaı kúrdeli hırýrgııalyq aralasýdy otandyq ortoped-travmatologter Sankt-Peterbýrgtegi N.Pırogov atyndaǵy joǵary medısınalyq tehnologııalar klınıkasynyń áriptesterimen birge atqardy. Operasııanyń qıyndyǵy sonda, bizdiń aldymyzda artyq bashpaıdy alyp tastaý ǵana emes, aıaqtyń kólemin qalyptan tys ulǵaıtatyn qosymsha metatarsaldy súıek máselesi de turdy. Tekserý kezinde mıkroskoppen jumys isteýdi talap etetin júıke men qan tamyrlarynyń ornalasýynda aýytqý qosa anyqtaldy», deıdi №2 BQKA travmatologııa bóliminiń meńgerýshisi Erlan Sadyrbalın.
Al dál osy kúnderi qyz balanyń ata-anasynyń qýanyshyn sózben aıtyp jetkizý múmkin emes. Olar operasııanyń sátti ótkeni týraly estigende qýanyshtan kóz jastaryna erik berip, dárigerlerge alǵysyn jaýdyrýmen boldy. Búginde kishkentaı pasıenttiń jaǵdaıy birtindep durystalyp keledi. Dárigerler qyz bala kóp uzamaı qurby-qurdastarynyń qataryna qosylady dep otyr.
Bir jaǵynan osynaý erekshe operasııanyń tarıhy joǵarydaǵy otbasyn úlken ýaıymnan, keselden qutqaryp qana qoımaı, otandyq zamanaýı medısına tipti eń kúrdeli jaǵdaılardyń túıinin tarqata alatynyn kórsetip otyr.
ALMATY
