Shoýdaýnǵa qoldaý qajet

Týrnırdi uıymdas­ty­rýshy, «Zaǵıptar ús­tel tennısi federa­sııasy» RQB prezıdenti Serik Júzbaı saıası partııalar arasynda doda ótkizý arqyly osy sport túrin keńinen nasıhattaýdy kózdeıtinin jetkizdi.

«Bizge qarjylaı qoldaý, qam­qorlyq qajet. Búgingi saıası partııa ókilderi arasyndaǵy týrnırdi de demeýshiler kú­shimen uıymdastyryp otyrmyz. Qolbaılaý bolyp turǵany – tennıs ústeli. Shetelden jasatýǵa qomaqty qarajat kerek. Astana qalasyndaǵy ortalyqta bir ǵana ústel bar. Osy aıadaı ǵana or­talyqta alty saıası partııa ókilderi sport­tyq saıysta tartysqa tústi. Qatysýshylar shoýdaýn ústel tennısi sportynyń qalaı damyp, órkendep kele jatqanynan qulaǵdar boldy. Bizdiń únimizdi tıisti oryndarǵa jetkizip, muqtajdyǵymyzdyń ótelýine septigin tıgizse deı­miz. Keleshekte kenjelep kele jatqan osy sport túrin keńinen na­sıhattap, damytqymyz keledi. Saıysty «Partııa kúshi – bir­likte, kóz janary – júrekte» dep ataýymyzdyń da ózindik syry bar. «Saýsaq birikpeı, ıne ilik­peıdi» qashanda. Federasııa jumysyn jandandyrýǵa bılik taraby da qoldaý kórsetip, qamqorlyq tanytsa, aýqymdy jobalardy júzege asyrýǵa qaıratymyz jetedi», degen Serik Júzbaı kásipkerlerdi de qoldaýǵa, demeýshilik tanytýǵa úndedi.

Aınalmaly júıe boıynsha ótken saıysta «Baıtaq» partııasy chempıon atanyp, «Respublika» partııasynyń ókilderi kúmis medaldy ıelendi. Qola júlde «Aýyl» Halyqtyq-demokratııalyq patrıottyq partııasynyń ókilderine buıyrdy. Jeńimpaz atanǵan, júlde ıelengen komanda mú­shelerine medaldar men arnaıy syılyqtar tabystaldy.

Elimizde shoýdaýn sportyna qyzyǵýshy zaǵıp jandardyń da qatary artyp keledi eken. I toptaǵy múmkindigi shekteýli jan Nurlan Jetpisbaev ár óńirde ashylǵan fılıaldardyń da jumysy jandanyp kele jatqanyn jetkizdi.

«Biz zaǵıp jandardy qoldaý, jigerlendirý maqsatynda jyl saıyn túrli saıystar ótki­zemiz. 2022 jyly alǵash uıym­dastyrǵanda 12 oblystan qaty­sýshylar kelse, byltyr 16 oblystan úmitkerler jınaldy. Jyldan-jylǵa shoýdaýn ústel tennısine qatysýǵa yqylas tanytýshylardyń qatary artyp keledi. Bizdiń sportshylar qarasha aıynda Polshaǵa, Shveısarııaǵa halyqaralyq saıysqa qatysýǵa barady. Aldaǵy ýaqytta Astana qalasynda halyqaralyq týrnır ótkizip, elimizde osy sport túriniń qalaı qarqyn alyp kele jatqanyn pash etsek deımiz. Biraq barlyǵyna qarajat qolbaılaý bolatyny qynjyltady. Demeýshiler tarapynan qoldaý tapsaq, qarjylyq qajettiligimizdi ótep beretin atymtaı-jomart azamattar demeýshilik tanytsa, qýanar edik», deıdi N.Jetpisbaev.

Halyqaralyq týrnır ótkizý úshin standartqa saı jabdyqty qamtamasyz etý mańyzdy. Mundaı ústeldi Italııada sapaly jasaıtyndyqtan, tapsyrys berýge qomaqty qarajat qajet. Bul sport túrine qatysamyn degen jandarǵa eshqandaı shekteý joq. N.Jetpisbaev ortalyqta jasy jetpistiń ishin qýalaǵan zeınetker kisi de ústel tennısin oınaıtynyn jetkizdi. «Munda aıaq-qol qımyldap, adamdy shı­ratady, estý qabiletin de jaq­sartady. Jetpisten asqan qarııa sergek júredi, ábjil qı­myldaıdy. Tipti jarys kezinde ózinen áldeqaıda jasy kishi oıynshylardy da yǵystyryp ketedi», deıdi N.Jetpisbaev.

«Aýyl» partııasy Astana qalalyq jastar qanatynyń tóraǵasy Mádı Júzbek múm­kindigi shekteýli jandarǵa jas­tar tarapynan qoldaý kórsetý maqsatynda týrnırge qatysýǵa kelgenin aıtty. «Kórý qabiletinen, tipti kóz janarynan aıyrylǵan jandardyń qaısarlyǵyna taǵy da tánti boldyq. Rasynda da shoýdaýn ústel tennısin oınaý, ádis-tásilin úırený aıtarlyqtaı qıyn eken. Kózimizdi tumshalap betperdemen jaýyp, qolymyzǵa tennıs qalaǵyn bergende qo­baljý da boldy. Zaǵıp jandar qashanda qoǵamnyń múshesi, eshqashan shetqaqpaı kórmeýge tıis. Biz aldaǵy ýaqytta osy sport túrin jastar arasynda nasıhattaý maqsatynda týrnır ótkizýdi josparlap otyrmyz. «Kózimniń qarasy» zaǵıptar ortalyǵyndaǵy týrnır tar­tysqa toly boldy. Chempıon atanýǵa barymyzdy salyp edik, buıyrǵany qola júlde. Bul sportty tereńdeı ıgerý úshin jıi oınap, tájirıbe jınaý mańyzdy. Aldaǵy ýaqytta damýyna ózimiz de úlesimizdi qosamyz», deıdi M.Júzbek.

«Zaǵıptar ústel tennısi federasııasy» respýblıkalyq qoǵamdyq birlestigi birneshe oblysta fılıalyn ashyp, ju­mysty júıeli júrgizip keledi. Zaǵıp jandardyń quqyq­taryn qorǵap, áleýmettik máselesin ońynan sheshýge, qoǵamǵa beıimdeý jolynda tap bolatyn kedergilerdi joıýǵa selbesetin birden-bir uıym.

Shoýdaýn ústel tennısiniń tarıhy 1960 jyldan tamyr tartady. Kanadalyq Djo Lıýıs pen Patrık Iork janary jaryq álemdi kórmeıtin zaǵıptar úshin oılap tapty delinetin bul sport túri keıin jazǵy Para­lımpııa oıyndarynyń baǵdarlamasyna da engen. 1980 jyly Nıderlandta ótken tórt­jyldyq dodasynyń baǵdar­lamasynda shoýdaýnnan da sport­shylar synǵa tústi. Odan keıin álem birinshiligi de uıym­dastyryldy. Degenmen de naqty erejesi uzaq talqylaýdyń nátıjesinde pisip-jetilip, 2009 jyly bekitildi.