Sýretterdi túsirgen – Esenjol Isabek
Asanáli Áshimuly – qazaq kınosyn álemdik deńgeıge kótergen akterlerdiń biri. Teatr salasynda da maıtalmannyń eńbegi jarqyrap kórindi. Mýzeı-kabınettiń ashylý saltanatynda akterdiń ózi atap ótkendeı, «ónerdiń jany – qushtarlyq, jaýy – ishtarlyq».
«О́ner ólkesinde atyń estile bastasa dushpanyń kóbeıetini bar. Adam synmen ósedi, aıtys-tartysta shyńdalady. Sharbolattaı ábden jetilip shyǵyp, ónerdiń kóginde qalyqtatatyn shabyt shirkinniń taýsylmaǵany abzal. Búgin erekshe tolqyp otyrmyn. Buqar jyraý mýzeıi maǵan aıryqsha syı jasady. Jastyq shaǵymdaǵy, kıno men teatrdaǵy umyt bolǵan keıbir estelikter oıǵa qaıta oralyp otyr. Sırek fotosýretterdi kórdim. Mýzeıdiń bul kabıneti meniń jeke tulǵama emes, qazaq kınosyna jasap otyrǵan tartýy dep uǵyndym. Kerekýdiń topyraǵy quıqaly, Jumat Shanındeı ulttyq teatr óneriniń negizin salýshy tulǵany, Sháken Aımanovtaı qazaq kınosynyń atasyn dúnıege ákeldi. Qanshama teatr jáne kıno akterleri, óner adamdary ósip shyqty. Sol atalarymyzdyń qasıetti rýhy búgingi urpaqty jelep-jebep, eldiń azamattary ónerdi kóterip jatqany meni aıryqsha qýantady. Mýzeı degen ótkendi jurtpen tabystyrý, rýhanııatty nasıhattaý bolsa, búgingi ónegeli is osy údeden tolyqtaı shyǵyp otyr», dep alǵysyn jetkizdi Asanáli Áshimuly.
Akterdiń qatysýymen kóptegen kınokartına Pavlodar oblysynyń Baıanaýyl aýdanynda túsirilgen. Olardyń arasynda «Qozy Kórpesh – Baıan sulý» sııaqty qazaq kınosynyń shedevrin atap ótýge bolady. Jer bederi kórkem fılm túsirýge jaıly ólkege kezinde Sháken Aımanov, sondaı-aq ózge de rejısserler túsirilim toptaryn jıi ákelgen.
Bir sát akter balalyq shaǵy jaıyndaǵy estelikterimen bólisti.
«Men joqshylyqty jetkinshek shaǵymnan kórip óstim. Ákem 25 jasynda maıdanǵa attanyp, sodan oralmady. Eńbektiń qadirin, nannyń qasıetin erte túsindik. Anamyzǵa kómek bolsyn dep ujymshar qyrmanyndaǵy tirlikke 4 jasymnan aralastym. Qyrmanshy shal meni astyq bastyratyn ógizdiń ústine mingizip qoıatyn. 1944 jyly mektep tabaldyryǵyn attadym. Áli kúnge esimde, joqshylyq saldarynan ábden qar túskenshe mektepke jalań aıaq baryp-qaıtatynbyz», dep tebirendi qazaq kınosynyń ańyzy.
Buqar jyraý atyndaǵy Ádebıet jáne óner mýzeıiniń basshysy Erbol Qaıyrov kabınetti ashýdaǵy maqsat – jurtshylyqty esimi elge syıly Asanáli Áshimulynyń óner jolymen tanystyryp, jastarǵa úlgi etý ekenin atap ótti.
«Munda akterdiń 15-ke jýyq jeke zaty, túrli túsirilimderdegi jáne otbasylyq sýretteri qoıylǵan. Jádigerlerdiń kópshiligin jyl basynda Almaty qalasyna arnaıy baryp, Asanáli aǵanyń ózinen alyp kelgen edim. Zattardyń ishinde akterdiń eńbekteri, shapany, kózildirigi, portfeli bar. Mýzeı-kabınet 2-3 jyl kóleminde ashyq turady. Keıin mundaǵy jádigerler arnaıy ekspozısııaǵa aınalady. Aldaǵy ýaqytta mýzeı qoryn elimizge tanymal ózge de óner jáne mádenıet qaıratkerlerine qatysty jádigerlermen tolyqtyratyn josparymyz bar», deıdi mýzeı basshysy.
Pavlodar oblysy
