Elordamyzdaǵy Jastar saraıynda merzimdi áskerı qyzmetke alynǵan jastardy saltanatty jaǵdaıda shyǵaryp salý rásimi ótti. «Kúz-2024» naýqany aıasynda uıymdastyrylǵan is-sharaǵa Ulttyq qaýipsizdik komıtetiniń Shekara qyzmeti áskerı bólimderine attanatyn jas órender qatysty. Ony ótkizýge Shekara qyzmetimen qatar, Astana qalasy Qorǵanys isteri departamenti, qalalyq Bilim basqarmasy atsalysty.
Bul is-sharanyń ereksheligi – oǵan elordamyzdyń 800-deı mektep oqýshysy shaqyrylyp, olarǵa arnaıy qarý-jaraq, baılanys quraldary, shekara baqylaý qyzmetinde qoldanylatyn tehnıka, qyzmettik ıtter kórsetilip, tolyq aqparat berildi. Maqsat – jas jetkinshekterge áskerı ómirdiń qyr-syryn tanystyrý, ımıdjin arttyrý, sondaı-aq bolashaq Otan qorǵaýshylardyń merzimdi áskerı qyzmetke degen qyzyǵýshylyǵyn oıatý.
Oqýshylarmen kezdesýde Astana qalasy ákiminiń orynbasary Erik Meıirhanov, Ulttyq qaýipsizdik komıtetine qarasty qurylymdardyń laýazymdy tulǵalary, sondaı-aq áskerge shaqyrylǵan jastardyń ata-analary sóz sóılep, oıymen bólisti. Is-shara aıasynda konserttik baǵdarlama uıymdastyryldy.
Kezdesý sońynda áskerge shaqyrylǵan 24 jas UQK Shekara qyzmeti Shyǵys Qazaqstan oblystyq departamentine jiberildi. Sol jaqtan aldaǵy bir jyldyq Otan aldyndaǵy boryshyn óteıtin áskerı bólimderge attanbaq.
Is-shara barysynda áskerge alynǵan jastar men oqýshylarǵa Qorǵanys mınıstrligi tarapynan qolǵa alynǵan «Srochnık 2.0» baǵdarlamasy tanystyryldy. Bul – áskerı qyzmettiń ımıdji men tartymdylyǵyn arttyrýǵa baǵyttalǵan arnaıy joba. Onyń aıasynda merzimdi qyzmet barysynda erekshelengen áskerı qyzmetshiler elimizdiń áskerı jáne azamattyq joǵary oqý oryndaryna UBT nátıjelerinsiz oqýǵa túse alady. Munda áskerı bólimderdiń komandırleri sarbazdardyń jetistikterin «Srochnık 2.0» onlaın-platformasynda tirkep otyrady. Sol arqyly olardyń úzdikteri anyqtalyp, jaýyngerlik daıyndyqta jaqsy nátıje kórsetken azamattarǵa joǵary oqý orny esebinen tegin joǵary bilim alý múmkindigi berilmek.
Sonymen qatar is-shara barysynda merzimdi áskerı qyzmettegi jastarǵa «nesıelik demalys» beriletini týraly da aıtyldy. Qazir basynda nesıesi joq adamdy tabý qıyn. Tipti mektepti endi bitirgen jastardyń da bankke bereshegi bolýy ǵajap emes. Sondaı jaǵdaıda onyń nesıeni óteý merzimi áskerden qaıtyp kelgenshe shegeriledi.
