Sýretterdi túsirgen – Valerıı Býgaev
Balalarǵa arnalǵan zamanaýı ortalyq buryn-sońdy qosymsha bilim berý nysandary bolmaǵan Ekinshi Pavlodar shaǵyn aýdanynda ashyldy.
О́ńir basshysy Asaıyn Baıhanov shaǵyn aýdannyń jas turǵyndaryn kópten kútken qýanyshpen quttyqtady.
– Ekinshi Pavlodar turǵyndarymen kezdesýlerdiń birinde biz osy shaǵyn aýdanda balalarǵa arnalǵan zamanaýı mekeme ashýǵa ýáde bergen edik. Búgin óz ýádemizdi oryndap, «Altyn saqa» atty jańa ınnovasııalyq-shyǵarmashylyq ortalyqty ashyp jatqanymyzǵa qýanyshtymyn. Bul jańa dostar tabýǵa, bilim alýǵa jáne bos ýaqyttaryńyzdy tıimdi ótkizýge bolatyn ekinshi úılerińiz bolsyn, – dedi aımaq basshysy.
«Altyn saqa» ınnovasııalyq ortalyǵy atalǵan aýmaqta turatyn 18 myń balaǵa arnalǵan qosymsha bilim berýdiń zamanaýı formaty retinde oqýshylardyń qyzyǵýshylyqtary men talanttaryn ashýǵa úlken múmkindikter beredi. Munda IT-stýdııa, robottehnıka úıirmeleri, shyǵarmashylyq, sporttyq jáne mýzykalyq baǵyttaǵy seksııalar jumys isteıtin bolady. Balalar tamaq ishetin býfet qarastyrylǵan. Qolóner sheberhanalarynda ustalyq ónerge jáne tigin tigýge úıretedi.
Osylaısha, Kereký óńirinde Memleket basshysynyń tapsyrmasy boıynsha urpaqtyń úılesimdi damýy úshin barlyq jaǵdaı jasalyp otyr. Buǵan deıin 800 balaǵa arnalǵan shyǵarmashylyq ortalyǵyn ashý úshin Ertis aýdanyndaǵy qaraýsyz qalǵan ákimshilik ǵımarat qaıta jańartylǵan bolatyn. Qazan aıynda Ekibastuz qalasynda «Samǵaý» balalar shyǵarmashylyǵynyń jańa ortalyǵyn ashý josparlanyp otyr. Sonymen qatar aldaǵy úsh jylda Ýspen, Sharbaqty jáne Pavlodar aýdandarynda da óner mektepterin salý josparǵa engen.
PAVLODAR
