Tanysyp, jón surasqan soń, kúrekteı alaqanymen jol nusqaı júrip, jádigerler jınalǵan úıdiń esigin ashty. Qos bólmesi tolǵan zat. Kóbisi keshegi keńes ókimeti tusyndaǵy turmystyq dúnıeler. Maıly boıaýmen jazylǵan azdy-kópti kartınalar da bar eken. Soǵan qaraǵanda, ózi de ónerden quralaqan emesteı kórindi.
– Zeınetkerlikke deıin qoryqshylyq qyzmette boldym. Tabıǵatty qorǵadym. Ol kezde mańaıda ań-qus kóp edi. Sóıtip júrip, kóne jádigerlerdi de jınastyrdym. Ermegim dese de bolady. Keı-keıde sýret te salatynmyn, – deıdi Baqyt Jumashuly sórelerde qaz-qatar tizilgen zattardy tanystyra júrip.
Ne joq deısiz bul jerde? Qyrqynshy jylǵy tarazy, XVIII ǵasyrdaǵy arbanyń aǵash dóńgelegi, shoq útik, toq útiktiń túr-túri, kerosın sham sekildi dúnıelerdi osy mýzeı-úıden tabasyz. Iá, mýzeı-úı dese de bolǵandaı. Mundaǵy keıbir dúnıe úlken mýzeılerde joq. Búgingi zamannyń balasy patefondy biler me edi? Kilti bir qarys qulyp, 1953 jyly jasalǵan aǵash oryndyq sekildi jádigerler de jeterlik.
Sórelerdi kózben shola júrip, osylardyń ishindegi eń qundysy qaısysy desek, jeke-dara turǵan jez sháýgimdi kórsetti. Bes lıtrlik bul sháýgimdi bir eshki, bir qaryn maı berip satyp alypty. Túp jaǵynda Týladan shyqqany belgilenipti. Zerttegendeı bolyp, jádigerler týraly ártúrli aqparat kózderine zer salsaq, 1930 jyldary jasalǵan sırek kezdesetin sháýgim eken.
Tize bersek, jádiger kóp. Tipti turyp jatqan úıi toly kóne zat. Kóbin suraǵandarǵa bere de salǵan eken. Mine, Qabanbaıda kópshilik bile bermeıtin osyndaı mýzeı-úı bar.
Shyǵys Qazaqstan oblysy,
Tarbaǵataı aýdany
