Sýretti túsirgen – Erlan OMAR, «EQ»
Úshinshi kúnniń shymyldyǵy medıa trener, jýrnalıst Mırhat Ájiǵalıevtiń baspasóz máslıhatyn ótkizýge qatysty sheberlik sabaǵymen ashyldy. Jıyn barysynda BAQ-qa sapaly materıal daıyndaý, aqparattyq ónimdi áleýmettik jelide ótimdi etý, qyzyqty telesıýjetter jasaý, sondaı-aq baspasóz máslıhatyn uıymdastyrý men ótkizýge qatysty naqty keıster usynyldy.
Atap aıtqanda, elimizde «aýaǵa salyq salynady» degen aqparat taralǵany mysal retinde alynyp, «ekologııa mınıstriniń» qatysýymen baspasóz máslıhatynan kórinis usynyldy. Mınıstr jýrnalıster aldynda bul aqparattyń mánin túsindirýi kerek, sondaı-aq onyń durys ekenin qorǵaýǵa tıis. Osy kezde baspasóz hatshylary qalaı áreket etýge tıis? Olar mınıstrdi qorǵaı ma, álde jýrnalısterge kómektese me? Osy suraqqa jaýap bergen medıa trener ómirden naqty mysaldardy keltirip, baspasóz hatshylaryna qysyltaıań shaqta tyǵyryqtan qalaı shyǵý kerektigi jaıynda óz keńesin usyndy.
Budan ári alǵashqy paneldik sessııa aldynda baspasóz qyzmetiniń úzdikterin marapattaý saltanaty ótti. Oǵan arnaıy qatysqan Mádenıet jáne aqparat vıse-mınıstri Qanat Ysqaqov mınıstrlik tarapynan segizinshi márte uıymdastyrylyp otyrǵan medıa aptalyǵyna qatysyp jatqan áriptesterine alǵys aıtty.
– Sizderdiń jumystaryńyz ben kúsh-jigerińizdiń arqasynda memlekettik organdar qyzmeti, jalpy memlekettiń aqparattyq saıasatynyń nátıjeleri buqaraǵa jetedi. Osyǵan oraı biz jyl saıyn Astana Media Week aptalyǵy aıasynda biliktilikterińizdi arttyrýǵa arnaıy semınar uıymdastyryp kelemiz. Aqparattyq doktrınada jumysymyzdyń basty faktory retinde elimizdiń aqparattyq qaýipsizdigi men buqaralyq aqparat quraldarymyzdyń básekege qabilettiligi atalǵan. Bul jumystarda baspasóz hatshylarynyń, baspasóz qyzmeti basshylarynyń jáne resmı ókilderdiń eńbegi asa mańyzdy. Sebebi olar memlekettik organdar tarapynan shyǵatyn aqparatty jedel tarata bilýi kerek. Sondyqtan elimizdiń aqparat qaýipsizdiginiń alǵy shebinde sizder tursyzdar. Mádenıet jáne aqparat mınıstrligi sizdermen qoıan-qoltyq jumys isteýge árdaıym daıyn, – dedi ol.
Budan ári «Jyl úzdigi-2024» atalymy boıynsha Almaty qalasy ákimdiginiń baspasóz hatshysy Álııa Adambaeva, Ishki ister mınıstrligi Aqparattyq saıasat departamentiniń bastyǵy Shyńǵys Álekeshev marapattaldy.
«Bul marapatty alǵanymyzǵa óte qýanyshtymyz. Biz úshin úlken mártebe. Bul – tek ortalyq apparat baspasóz qyzmetiniń ǵana emes, elimizdiń barlyq óńirindegi polısııa bólinisterinde jýrnalıstermen qoıan-qoltyq eńbek etip júrgen áriptesterimizdiń de eńbegi», dep qýanyshymen bólisti Sh.Álekeshev.
Bul kúnniń alǵashqy sessııasynda iMAS GROUP PR dırektory Aınel Rymbaeva «Medıaındýstrııadaǵy ınnovasııalar: tıimdi kommýnıkasııalardy qurýdyń 10 keısi» taqyrybynda dáris oqydy. Odan ári jalǵasqan paneldik sessııalarda «LinkedIn úkimet pen baspasóz hatshylary úshin: brendti qurý jáne aqparatty taratý», «Baspasóz qyzmetteriniń etıkasy: blogerlerden robottarǵa, JI men vırtýaldy kómekshilerge deıin», «Tolassyz aqparattyń qoǵamǵa áseri», «Teorııa men praktıkadaǵy sendirý men keshirim suraýdyń zamanaýı ádisteri» taqyryptarynda áńgime órbidi. Bul basqosýlarda «7010 Podcast» podkastynyń avtory Zarına Býenbaeva, «Ádil sóz» halyqaralyq sóz bostandyǵy qorynyń prezıdenti Karla Jamanqulova, jýrnalıst Saıat Jóken, jýrnalıst, redaktor, jazýshy Azamat Baıǵalıev syndy sala mamandary óz oıyn ortaǵa saldy.
Úsh kúnge sozylǵan aptalyqqa elimizdiń barlyq aımaǵynan kelgen jýrnalıster men baspasóz qyzmetteriniń, ózge de sala ókilderi elge tanymal kóshbasshy medıamenedjerler men mamandardyń dáristeri men keısterin tyńdap, zaman yrqyna qaraı ózgeriske túsip jatqan jýrnalıstıka damýy jaıynda kóp málimet aldy. Taraz qalasy ákiminiń keńesshisi Dáýlet Tólendiuly – Astana Media Week aptalyǵynyń turaqty qatysýshysy. Onyń aıtýynsha, úsh kúnge sozylǵan bıylǵy kezekti aptalyq ta aqparat salasynyń qyzmetkerleri úshin jańashyldyqqa toly boldy, sondaı-aq árbir qatysýshy ózine kerek dúnıeni aldy.
«Men qazir memlekettik qyzmette júrgenimmen, áý bastan jýrnalıstıka salasynyń ókilimin. Jalpy, Astana Media Week sekildi aýqymdy is-sharalar – tek jýrnalıster úshin ǵana emes, memlekettik qyzmettegi adamdarǵa da paıdasy zor jıyn. О́ıtkeni bıylǵy is-sharanyń negizgi taqyryby sıfrlandyrý, jasandy ıntellekt tóńireginde órbip jatyr. Al bul jańashyldyqtar qoǵamnyń árbir ókiline tikeleı qatysty desem, artyq aıtqandyq emes», dep D.Tólendiuly oıymen bólisti.
Batys Qazaqstan oblysy О́ńirlik kommýnıkasııalar qyzmetiniń basshysy Mahambet Sultanǵalıdyń aıtýynsha, Astana Media Week aptalyǵynda aıtylyp jatqan taqyryptarǵa qarap otyryp, qazirgi mass medıanyń tolyqtaı sıfrlyq zamanǵa aıaq basqanyn kórýge bolady jáne bul – birden-bir durys qadam.
«О́zderińiz bilesizder, kezinde Kodak fotoapparattary tanymal edi. Alaıda keıingi jyldary olar kózden bul-bul ushty. Ne sebepti? О́ıtkeni olar zaman aǵymyna beıimdelmedi, ıaǵnı óz ónimderin sıfrlandyrýǵa asyqqan joq. Sonyń saldarynan basqa oıynshylarmen básekelestikte jeńilis tapty. Biz osy mysaldy jýrnalıstıka salasyna qatysty da aıta alamyz. Qazirgi buqaralyq aqparat quraldary da sıfrlyq platformalarǵa kóship, halyq suranysyna jańasha negizde jaýap berýge tıis. Konservatıvtik kózqarastan birtindep bas tartyp, jańa zaman talaptaryna beıimdelgen BAQ-tyń bási joǵary bolatyn ýaqyt keldi», deıdi ol.
Al Qaraǵandy oblystyq Polısııa departamentiniń baspasóz hatshysy Baqytjan Qudııarov halyqpen jumys isteý, kún saıyn paıda bolatyn aqparattardy durys taratý ishki ister salasy úshin asa mańyzdy jumys ekenin aıtady. Polısııa bólinisteriniń birlese eńbek atqarýy arqyly bıyl Ishki ister mınıstrliginiń baspasóz qyzmeti «Jyl úzdigi» atanǵanyna qýanyshty ekenin jetkizgen ol: «Bul – kúndiz-túni polısııanyń eńbegin kórsetip jatqan baspasóz qyzmetkerleri men osy salaǵa jaýapty tártip saqshylarynyń eńbegi. Polısııa salasynda júrgen biz úshin bul aptalyqtyń orny erekshe. О́ıtkeni búgingi basqosý baspasóz qyzmetin jetildirýge arnaldy. Elimizdiń kóp óńirinen kelgen meniń áriptesterim de buǵan belsene qatysty. Mundaı is-sharalar jylyna bir ret emes, birneshe ret ótip tursa da, kóptik etpeıdi», dep oıyn túıindedi.
