Danııar – Djo Noınaıdy jeńdi

Rıo Olımpıadasynyń, álem chempıony, Azııa oıyn­darynyń eki dúrkin jeńimpazy, álem chempıona­tynyń kúmis júldegeri, qurlyq­tyń eki dúrkin chempıony Danııar Eleý­sinovtiń qarsylasy da osal emes edi. 28 jastaǵy Djo Noı­naıdyń kásipqoılar arasyn­da kúsh synasyp júrgenine 11 jyldan asty. Sol kezden beri rıngke 29 márte kóterilip, 23 ret jeńiske jetti. 11 kezdesýdi mer­ziminen buryn aıaqtady. Tórt ret utylyp, eki márte teń tústi. Biraq qazaqtyń qaısar ulyna Djo laıyqty qar­sylyq kór­sete almady. 10 raýndqa eseptelgen jekpe-jek bel ortadan asqan tusta aıaqtaldy. Birinshi, tór­tinshi raýndtarda nokdaýn alǵan Noınaı besinshi raýndtan keıin básekeni jalǵastyrýdan bas tartty. Sóıtip Danııar WBC Peace nusqasynyń chempıondyq bel­beýin ıelendi.

Árıne, jerlesimizdiń bul je­ńisine qýandyq. Desek te erekshe bir shattanyp, keýdemizdiń maqtanysh sezimi kernedi dep aıta almaımyz. О́ıtkeni Danııar­dyń áleýeti budan da zor edi. Osydan birer jyl buryn áýes­qoı bokstaǵy barlyq belesti ba­ǵyndyrǵan otandasymyzdyń kásipqoı rıngtiń de ushar shyńyna shyǵatynyna kúmándanǵandar kemde-kem edi. Biz ony AQSh-ta, Nıý-Iorktegi áıgili «Medıson-skver-gardennen» kórgimiz keldi. Biraq bári oılaǵandaı bolmady. Ol jerde Eleýsinov bir ǵana jekpe-jek ótkizdi. 2019 jylǵy 13 qyrkúıekte jergilikti boksshy Reshard Hıksty birinshi raýndta uryp jyqty. Keıinnen taǵy eki kezdesýin Amerıkanyń Fınıks pen Hollıvýd qalalarynda ót­kizdi. Sońǵy ret 2021 jylǵy 19 jeltoqsanda Astanada ar­gen­tınalyq Hýan Ernan Leal­dy upaı sanymen utyp, IBO nus­qasynda chempıondyq tájdi ıelendi. Sodan keıin Danııar eki jylǵa jýyq ýaqyt boıy kópshilik nazarynan tys qaldy.

Qazir Danııardyń jasy 33-te. Qartaıyp turǵan joq. Dál osy jasynda sharshy alańda jasyndaı jarqyldap júrgen jýan judyryqty jigitterdiń qatary qalyń. Qandasymyz myqty bir promoýter, menedjer taýyp, sonymen jaqsylap jumys isteýi kerek. Bizge keregi – Eleýsinovtiń Astana nemese Almatyda emes, alys­taǵy Amerıkada aıqasqany. Bıik belesterdi baǵyndyrýdy maqsat tutqan azamattyń shoqtyǵy bıik boksshylardyń shoǵyrlanǵan jerinde, solardyń qaq ortasynda júrgeni áldeqaıda tıimdi. Tek sonda ǵana Danııar kásipqoılar arasynda Vasılıı Jırov, Gennadıı Golovkın nemese Jánibek Álim­hanuly sekildi ózin túbegeıli mo­ıyndatady. Osy kúnge deıin Eleýsinov 12 jekpe-jek ótkizip, bar­lyǵynda jeńiske jetti. Jeti jekpe-jekte qarsylastaryn nokaýtqa jiberdi.

Almatydaǵy boks keshinde bir top aralas jekpe-jek sheberleri kásipqoı rıngte óner kórsetti. «Naıman» degen janama esimmen tanylǵan atyshýly Qýat Hamıtov Nurbergen Sháripovti upaı sanymen utty.

Kásipqoı rıngtegi tusaýkeser kezdesýinde Juman Jumabekov tájik Asror Akparhodjaevtan aılasyn asyrdy. Dastan Beken men Erasyl Aqyranbek te jeńis­ke jetti. Alǵashqysy MMA-da «Motıvator» degen búr­ken­shik esimdi ıelengen Ánýar­bek Bekembetovten basym tússe, ekin­shisi reseılik Mıhaıl Dol­gopo­lovtyń osal tusyn tapty. Al Ádiljan Sandybekov Reseıde týyp-ósken qandasymyz Elnar Ishım­baevqa ese jiberdi.