Eskertkishti Memlekettik keńesshi Erlan Qarın jáne jazýshynyń týysy Dıar Qonaev ashty.
Erlan Qarın Memleket basshysy Qasym-Jomart Toqaevtyń quttyqtaý hatyn oqyp berdi. Onda: «Muhtar Áýezov – ult rýhanııatynda aıryqsha orny bar uly jazýshy. Ol shyǵarmalarynda halqymyzdyń bitim-bolmysy men tynys-tirshiligin sheber sýrettedi. Qalamgerdiń teńdessiz týyndylarynan ana tilimizdiń baılyǵy men tól órkenıetimizdiń tereńdigi aıqyn kórinedi. Shyn máninde, jurtymyzdyń jan dúnıesin bilgisi kelgen adam eń aldymen Áýezovti oqýy kerek. Muhań Abaıdy, Abaı arqyly qazaqty tórtkúl dúnıege tanytty. Sóz zergeriniń «Abaı joly» epopeıasy – halqymyzdyń álem ádebıetine qosqan qundy qazynasy. Ol Abaıtanýdyń negizin qalady. Jazýshylar men ǵalymdardyń tutas býynyn tárbıelep shyǵardy. Alash arystarynyń amanatyn keıingi býynǵa jetkizip, el múddesin qorǵaý úshin san ret basyn báıgege tikti. Biz ulttyń rýhy bıik bolsyn desek, halqyna adal qyzmet etken uly tulǵalarymyzdy árdaıym ulyqtaı bilýimiz qajet. Ol – óskeleń urpaqtyń perzenttik paryzy. Astana tórindegi Muhtar Áýezovtiń eskertkishi – osy paryzǵa adaldyǵymyzdyń taǵy bir kórinisi. Zańǵar jazýshynyń asyl murasy qazaqpen birge máńgi jasaı beredi. Sáýlet óneriniń týyndysy el ıgiligine aınalsyn», dep kórsetilgen.
Sonymen qatar Memlekettik keńesshi jazýshyny qalaı ulyqtasa da jarasatynyn aıtyp, onyń álem ádebıetine qosqan úlesin atap ótti.
Belgili jazýshy, Memlekettik syılyqtyń laýreaty Tólen Ábdik rýhanı is-sharanyń keler urpaq úshin aıryqsha mańyzyn jetkizdi. «Búgingi ornatqan myna eskertkish jaı eskertkish emes. Bizden keıin de talaı urpaq keledi ómirge. Sonda osy eskertkishterge qarap otyryp qalyptasady. Olardyń kóńilinde, janynda tek qana bir jaqsylyqtyń, izgiliktiń ǵana rámizi bolyp qalatyny daýsyz», dedi jazýshy.
Músinshiler Aıdos Búrkitbaev pen Tımýr Ermuhametov jasaǵan sáýlet óneriniń týyndysy elordadaǵy Qalıbek Qýanyshbaev atyndaǵy Qazaq ulttyq mýzykalyq drama teatrynyń aldynda ornatyldy.
