Foto: freepik.com
Sońǵy jyldary Qazaqstanda memlekettik qyzmetkerlerge syılyq berýge shekteýler kúsheıtildi. Sybaılas jemqorlyqqa qarsy sharalardyń muǵalimderge de qatysy bar. Biraq mektep muǵalimderine arnalǵan syılyq máselesi jyl saıyn jelide talqylanady.
«Ustazdar kúni - ustazdardyń ómirimizdegi mańyzdy ornyn eske túsiretin erekshe mereke. Bul bizdiń bilim men tárbıemizge janyn qıǵan jandarǵa alǵys aıtý múmkindigi. Gúlder, jyly lebizder - munyń bári de nyshan. Ustazdarymyzǵa degen qurmet pen rızashylyqty bildiretin qımyldar urpaqtar arasyndaǵy baılanysty nyǵaıtyp, ustaz eńbeginiń qanshalyqty mańyzdy ekenin kórsetedi», dep jaýap berdi Oqý-aǵartý mınıstrliginiń baspasóz qyzmeti.
Eske sala keteıik, zańǵa sáıkes, eger syılyq quny 5 AEK-ten (18 460 teńge) assa onda bul Qylmystyq kodekstiń 247-baby boıynsha qylmystyq jaýapkershilikke ákep soǵýy múmkin. Alaıda, aldyn ala kelisilmegen, 5 AEK-ke deıingi (18 460 teńge) shaǵyn syılyqtar úshin ustazdar Qylmystyq kodekstiń baby boıynsha jaýapkershilikke tartylmaıdy.
Buǵan deıin Oqý-aǵartý mınıstri Ǵanı Beısembaev ustazdarǵa gúl syılaý ıgi dástúr ekenin atap ótken edi.
«Tátti-tápsekke qatysty oılaný kerek. Árkimniń qalaýy ártúrli. Biraq oqýshylardan muǵalimniń gúl alýy kóńil-kúıdi kóteretin úrdis. Oqýshylardyń muǵalimderge qurmet retinde gúl syılaýy dástúrge aınalǵan. Sondyqtan ony durys dep esepteımin. Gúl syılaý − árkimniń óziniń kóńili men nıetine baılanysty. Biraq gúl syılaýdy mindettemeý kerek», dedi mınıstr.
