Kúni keshe qazan aıynyń 1-i kúni 90 jasqa tolǵan eńbek ardageri osy jasqa kelgenshe qoǵamdyq-saıası ómirden qol úzgen emes.
«Referendým degen – eldik sharýa. Qasym-Jomart Toqaev prezıdenttikke kelgeli beri elimizde ekinshi ret referendým ótip otyr. Bul – el taǵdyryna qatysty máselede halyqpen aqyldasýdyń, olardyń pikirimen sanasýdyń belgisi dep oılaımyn. Sondyqtan otbasymmen, bala-kelin, nemerelerimmen kelip óz tańdaýymyzdy jasadyq», deıdi ataqty geolog-barlaýshy.
Tursynǵalı aqsaqal kezinde Bakýdyń M.Azızbekov atyndaǵy polıtehnıkalyq ınstıtýtyn bitirgen mańǵystaýlyq alǵashqy burǵyshy-ınjener. Jetibaı ken ornyn ashýshy ken barlaýshylarynyń biri, tek Jetibaı emes, soǵan ilese ashylǵan birneshe ken oryndarda Tursynǵalı Kóshenovtyń taban et, mańdaı teri jatyr.
Tursynǵalı Kóshenov 1934 jyly kúz aıynda Fort-Shevchenko qalasynan 35 shaqyrym jerdegi Tamshaly degen jerde dúnıege kelgen. 1954 jyly 10 synypty úzdik bitirip, Baký qalasyndaǵy M.Azızbekov atyndaǵy Ázerbaıjan ındýstrıaldyq ınstıtýtynyń «Munaı jáne gaz keń oryndaryn ıgerý» fakýltetiniń stýdenti atandy.
1959 jyly ınstıtýttaǵy oqýyn bitirip, Atyraý qalasyndaǵy Batys Qazaqstannyń geologııalyq basqarmasyna joldama alyp, sol jyly Mańǵystaýǵa qaıta oraldy. Tamyz aıynda «Mańǵyshlaqmunaıgazbarlaý» tresinde jańadan ashylǵan Túbijik ken ornyna burǵyshy sheberi bolyp eńbek jolyn bastady. Sodan bastap, osy salada jarty ǵasyrdan astam ýaqyt basshylyq qyzmet etip, óz mamandyǵynyń maıtalmany atanǵan.
Mańǵystaýdyń eń alǵashqy munaı ınjeneri búginde zaıyby Hanshaıym Júsipovamen birge ulaǵatty urpaq ósirip, nemere men shóbereniń qyzyǵyn kórip otyr.
Mańǵystaý oblysy
