Semeı qalalyq mádenıet saraıyndaǵy №84 ýchaskelik referendým komıssııasynyń tóraǵasy Aınur Muratqannyń aıtýynsha, atalǵan aýmaqta 1 myńnan asa adam daýys bergen.
– Bizdiń ýchaskede alǵash ret 50 jas azamat daýys berdi. Olarǵa referendým komıssııasy músheleri estelik syılyq tabys etti. Sonymen qatar ýchaskede tirkelgen daýys berýshilerdiń ishinde 52 saılaýshy ózderiniń úı-jaılarynda tańdaýyn jasady, – deıdi A.Murathanqyzy.
Qoǵamdyq kólikter turǵyndar men meımandardy tegin tasymaldady. Ýchaskelerde múmkindigi shekteýli adamdarǵa arnaıy taktıldi kórsetkishter, pandýstar ornatylǵan. Ýchaskelerde ondaı azamattarǵa arnalǵan kabınalar sany 110-dy qurap, 6 sýrdoaýdarmashy men 16 ınvotaksı kómek qolyn sozdy.
Oblys ortalyǵynyń shetindegi Voshod kentiniń turǵyndary №108 ýchaskede daýys berdi.
«Kámelettik jasqa tolyp, alǵash ret referendýmǵa qatysqandar – 4 adam. Al tańǵy 9.00-den bastap ýchaskedegi referendým komıssııasynyń músheleri úı-úıdi aralap, aq jaýlyqty analar men aqsaqaldardyń jalpyulttyq naýqannan shet qalmaýyna jaǵdaı jasady», deıdi referendým komıssııasynyń tóraǵasy Janna Daýkenqyzy.
Qyryq jyldan asa aýyl sharýashylyǵy salasynda aıanbaı eńbek etken 80 jastaǵy Meıramhan Shynarov aqsaqal komıssııa múshelerin yqylaspen qarsy alypty. Zaıybymen birge óz shańyraǵynan daýys berýge ótinish bildirgen olar eldegi ózgeristi, ádilettilikti qoldaıtynyn jetkizdi.
Abaı oblysy
