QBTÝ – ozyq bilim berýdiń úlgisi

Ýnıversıtette 7 700 jas bilim alady

Qazirgi kezde Qazaq-Brıtan tehnıkalyq ýnıversıteti ornalasqan ǵımarattyń irgetasy 1957 jyly qalanǵan. Tarıhı ǵımarat qaladaǵy kórnekti arhıtektýralyq eskertkish sanalady. Kezinde Qazaq KSR Úkimet úıi bolǵan ǵımaratta 1990 jyly Egemendik deklarasııasy qabyldanǵan bolsa, qazirgi kezde halyqaralyq standartqa saı bilikti kadrlar daıarlanyp keledi.

«QBTÝ mamandary tarıhı ǵımaratta jumys isteıtinin maqtan etip, NNEF qorynyń qoldaýymen osynaý erekshe nysandy damytýǵa múmkindik alyp otyrǵanyn úlken mártebe sanaıdy. Qordyń qoldaýy nátıjesinde bilim baǵdarlamalary 16-dan 68-ge deıin artty, 35-ten astam zerthana ashyldy. Osy ınvestısııalar ýnıversıtetti jańa deńgeıge kóterdi. QBTÝ kóshbasshylardy daıarlaýǵa jol ashty. Urpaqtar sabaqtastyǵynyń rámizin kórsete otyryp, tarıhı muralar men zamanaýı tehnologııalardy tıimdi ushtastyrýdyń úlgisine aınaldy», dep atap ótti QBTÝ rektory Maratbek Ǵabdýllın.

QBTÝ Ǵylym jáne ınnovasııalar jón­in­degi prorektory Dıdar Batryshev atap ótkendeı, stýdentter zamanaýı jabdyqtalǵan ǵımaratta sapaly bilim alýmen qatar, aıtýly tulǵa, memleket jáne qoǵam qaıratkeri D.Qonaevtyń jáne táýel­sizdiktiń alǵashqy jyldarynda el damýyna súbeli úles qosqan tulǵalar ómirbaıanymen tanysyp, óz eliniń ótkeni men búginin sabaqtastyra otyryp, jańa tehnologııaly salalardy ıgerýde bilimdiler údesinen shyǵý múmkindigi joǵary.

QBTÝ Áleýmettik jáne tárbıe jónindegi prorektory Ekaterına Smolıakova baspasóz týry aıasynda qatysýshylardy kúrdeli jóndeýden keıingi ýnıversıtet aýdıtorııa­larymen tanystyryp, ǵımarattyń tarıhı kezeńine sholý jasady. Qazirgi kezde QBTÝ-da bakalavrıat, magıstratýra men doktorantýrada 7 700 jas oqyp jatyr. Stýdentterdiń 82 paıyzy – memlekettik grant ıegerleri.

Bilikti kadrlar daıarlaıdy

Ýnıversıtettegi oqý zaldary, zerthanalar zamanaýı quraldarmen jabdyqtalǵan. Stý­dentter osy múmkindikterdi paıdalana otyryp, bilimniń ozyq úlgisin ıgerip, halyqaralyq keńistikte básekege qabilet­tilik qaǵıdattaryna tolyqqandy jaýap berip keledi.

 «Smaty field Airankol» jobasy – stýdentter úshin «Airankol» ken ornynyń naqty derekterine qol jetkize alatyn aıryqsha zerthana. Munda teorııalyq bilimdi prak­tıkalyq is-áreketpen ushtastyrýǵa tolyq­qandy jaǵdaı jasalǵan.

Energetıka jáne munaı-gaz ındýs­trııasy mektebiniń dekany Abdýlahat Ismaı­lovtyń aıtýynsha, Atyraýdaǵy «Airankol» ken orny qazirgi kezde tolyǵymen avtomat­tandyrylǵan. Zerthanada stýdentter ken or­nynyń jumysymen tanysyp, uńǵy­lardy, burǵylaý jumystaryn mobıl­di karta arqyly kórip otyrady. Stýdent­ter munymen qosa «Alataý» erkin ekono­mıkalyq aımaǵynda ornalasqan bes uń­ǵylaý óndiristik oqý alańynda tájirı­beden ótedi. Ýnıversıtettegi ındýs­trııalyq komıtette elimizdegi kásipo­ryn­dar, kompanııalardyń ókilderi jylyna eki ret jınalyp, tájirıbesin bólisip otyrýy dástúrge aınalǵan. Bul dástúr aıasynda jańa ádister men tehnologııalardy óndiriske engizýdiń modýldik kýrstary ótkizilip turady.

«Shneider Elektric» ónerkásiptik avtomattandyrý zerthanasynda stýdentter ónerkásiptik úderisterdi avtomattandyrýdy oqyp-úırenip, tehnologııalyq basqarýdyń meılinshe jańa júıelerin meńgeredi.

«Halil Akademy» kıberqaýipsizdik zerthanasy – stýdentterge aqparattyq qaýipsizdik pen etıkalyq hakerlik ádisterdi zertteýge múmkindik beretin zamanaýı jabdyqtar men baǵdarlamalyq qosymshalarmen jab­dyqtalǵan oqytý platformasy.

Balamaly energetıka men nanotehnologııalar zerthanasy – jel, kún energetıkasy, juqa plenkalar sıntezi salasyndaǵy zertteýlerdi qamtıtyn ǵylymı qyzmettegi jetekshi baǵyttyń biri.

«Honeywell» zerthanasy – QBTÝ 2018 jyly «Honeywell International Inc.» kompanııasymen memorandýmǵa qol qoıyp, nátıjesinde avtomattandyrý ortalyǵy qurylǵan bolatyn. Zerthanada stýdentter zaýyttyń sıfrlyq negizderin jasaýǵa múmkindik beretin úderisterdi ıgeredi. Zaýytty basqarý baǵdarlamasyn meńgergen túlekter óndiriske jyldam beıimdeledi.

Qazaqstan Teńiz akademııasy – elimizdiń teńiz salasyna halyqaralyq talapqa saı kadrlar daıarlaıtyn birden-bir fakýltet. «2012 jyldan bastap Kaspıı óńiriniń teńiz ındýstrııasyna kadrlar daıarlaýdyń jańa standarttary bekitildi. Búginde bizdiń túlekter úshin teńiz keńistigine ashylǵan múmkindik kóp. Oqýdy bitirgennen keıin «Qazaqteńizkólikfloty», «NCOC», «COC», «Topaz Marine», «TShO» sııaqty jáne basqa da iri korporasııalarǵa barlyq talapqa saı mamandar osy akademııada daıyndalady», dep atap ótti fakýltet dekany Ramıl Bıktashev. Munda aǵylshyn tilinde oqı júrip, stýdentter túrli teńiz zerthanalary men trenajerlaryn, sondaı-aq halyqaralyq teńiz tájirıbesin ıgeredi. Akademııada Germanııa, Oman, AQSh jáne Nıderlandta daıyndalǵan bilikti oqytýshylar dáris beredi.

Innovasııalar men halyqaralyq yntymaqtastyq

QBTÝ-da Ulybrıtanııa, Norvegııa, basqa elderdiń jetekshi joǵary oqý oryndarymen yntymaqtastyq jolǵa qoıylǵan. Nátıjesinde, stýdentter halyqaralyq jobalar men stýdent almasý baǵdarlamalaryna qatysyp, jahandyq eńbek naryǵynda básekege qabilettiligin dáleldep keledi. Aqparattyq tehnologııalar jáne ınjenerııa mektebiniń dekany Azamat Imanbaevtyń aıtýynsha, ýnıversıtette stýdentterge ıdeıalaryn júzege asyryp, jańa tehnologııalardy qoldana alatyn, bolashaqta naqty máselelerdi sheshe alatyndaı jaǵdaı jasalǵan. Halyqaralyq seriktestermen yntymaqtastyq stýdentterge teorııalyq jáne praktıkada mol is-tájirıbe jınaq­taýǵa jaǵdaı jasaıdy.

Qazirgi kezde Aqparattyq tehnologııalar jáne ınjenerııa mektebiniń stýdentteri jasandy ıntellekt, robottehnıka salasyndaǵy zamanaýı bilimdi ıgerip, álemmen yqpal­dastyqta damyp keledi. Stýdentter quras­tyrǵan robottar adam jumysyn jeńil­detip, qaýipsizdik salasynda, qoljetimsiz keńistikte jańa tehnologııalardyń múm­kinshiligi joǵary ekenin kórsetip otyr. Stýdentter tehnologııalardyń kómegimen jańa ázirlemeler jasap, olardyń prototıpin qurastyrýmen aınalysyp jatyr. Mobıldi robottar, drondar, ındýstrııaldy robottar zerthanada iri zaýyttardaǵy avtomattandyrý, elektronıka qurylǵylarymen keshendi jumystardy úırenýge múmkindik beredi.

Urpaqtar sabaqtastyǵy jáne tarıhı muralardy saqtaý

Press-týr baǵdarlamasy kúni búginge deıin tarıhı bastapqy qalpy saqtalyp kelgen, kezinde akademık D.Qonaev otyrǵan kabınetti kórýmen jalǵasty. Munda árbir buıym, sýretter, jıhazdar el tarıhynyń keshegisinen syr shertip qana qoımaı, óskeleń urpaqqa jańa zaman tehnologııasyn úırene otyryp, bilim men ǵylym keńistigin ıgerýge úlken jaýapkershilik júktep turǵandaı áser beredi. Munda stýdentter kúndelikti leksııa tyńdap, el tarıhyna qatysty qundy málimetterdi zerdeleıdi.

Ýnıversıtettiń 20 jyldyǵyna oraı ári QBTÝ-dyń keleshek stýdentter býynyna arnalyp salynǵan ýaqyt kapsýlasy jobasy – oqý orny basshylyǵynyń bilim berý úrdisinde jyldamdyq pen tereń bilimdi bas­ty qaǵıdat etip ustaıtynynyń dáleli.

QBTÝ stýdentterine táýlik boıy bilim alýǵa qolaıly jaǵdaı jasalǵan. Munda zamanaýı jabdyqtalǵan ǵylymı kitaphanada 200 myńnan astam kitap qory bar. Sonyń 100 myńnan kóbin elektrondy formattaǵy ádebıetter quraıdy. Bıyl qordy tolyqtyrý úshin 24 mln teńge qarastyrylypty. Kitaphananyń kireberisinde stýdentter ázirlegen Face ID qoldanysta. Avtomattandyrylǵan kitaphana portaly ınklıýzıvti júıemen de stýdentterdiń bilim alýyn jeńildetip otyr. QBTÝ-da stýdentterge jasalǵan tolyqqandy jaǵdaı olardyń álemdik bilim úrdisiniń bir bólshegi retinde qarqyndy damyp jatqanyn aıǵaqtaıdy.

Baspasóz týry aıasynda ótken brıfıngte ýnıversıtet ókilderi jýrnalıster men blogerlerdiń suraqtaryna jaýap berdi. Oqý orny basshylyǵy qala turǵyndary men qonaqtaryna turaqty ekskýrsııalar uıymdastyrý josparlary týraly baıandap, sondaı-aq tarıhı ǵımarattardy saqtaý jáne damytý máseleleri boıynsha qalanyń Qoǵamdyq keńesiniń kóshpeli keńesin ótkizýge usynys jasady.

ALMATY