Sýret: akorda.kz
Memlekettik keńesshi kezdesýde otandyq oqýshylardyń jyl saıyn kóptegen halyqaralyq bilim dodasynda top jaryp júrgenin atap ótti. Bıyl órenderimiz álemniń túrli elinde ótken pándik olımpıadalarda 26 medal ıelenip, el abyroıyn asqaqtatty.
Sondaı-aq Memlekettik keńesshi Prezıdenttiń jaqynda ótken Depýtattar forýmynda sóılegen sózinde jurtshylyqty sportshylarǵa ǵana emes, zııatkerlik saıystardyń jeńimpazdaryna da laıyqty qurmet kórsetýge shaqyrǵanyn eske saldy. Onyń aıtýynsha, 2022 jyldan bastap Memleket basshysynyń bastamasymen halyqaralyq pán olımpıadalarynyń jeńimpazdaryna jáne olardyń ustazdaryna aqshalaı syılyq tabystalady. Bul rette Qazaqstan – bilim olımpıadasy júldegerlerine osyndaı qoldaý kórsetetin sanaýly eldiń biri.
Memlekettik keńesshi Qazaqstanda jastarǵa ózin jan-jaqty jetildirýge barlyq jaǵdaı jasalǵanyna, ásirese, óskeleń urpaq úshin bilim men ǵylym salasynda mol múmkindik bar ekenine nazar aýdardy.
Ulttyq quryltaı otyrystarynyń birinde Memleket basshysy bilim, ǵylym jáne mádenıet salasyn rýhanı damýdyń myzǵymas úshtaǵany jáne ulttyń jańa sapasyn qalyptastyrýdyń negizi dep aıtqan bolatyn.
Kezdesý sońynda Erlan Qarın olımpıada jeńimpazdaryna jyly lebizin bildirdi. Olardyń bilimi, izdenisi, otanshyldyǵy eldiń mektep oqýshylaryna úlgi-ónege ekenin atap ótti.
