Foto: port-express.ru
17 qazan kúni Týrızm jáne sport mınıstri Erbol Myrzabosynov áleýmettik jelidegi paraqshasynda Stanıslav Cherchesovtiń qaljyńy orynsyz bolǵanyn atap ótip, dese de keshirimmen qaraýdy surady. Onyń kásibı qyzmetine qarap baǵa berý kerek ekenin eskertti.
«Qurmetti dostar!
Árıne, Stanıslav Cherchesovtiń «fransýz tiline» qatysty qaljyńy orynsyz boldy. Muny Qazaqstan fýtbol federasııasy da, bapkerdiń ózi de bek túsinedi.
Degenmen, Cherchesovtiń basty mindeti – ulttyq quramany jańa deńgeıge shyǵarý. Endeshe, oǵan eń aldymen kásibı qyzmetine qarap baǵa berýge shaqyramyn.
Biz qashannan qonaqjaı, darhan minezdi, keshirimdi elmiz. Bizdi myqty el etetin de osy qasıetter. Sondyqtan máseleni odan ári órshite bermeı, halqymyzǵa tán keńpeıildik tanytqanymyz abzal.
Kez kelgen daýly máseleni aqyl-parasatpen sheshetin tolerantty, órkenıetti, ıaǵnı dana qoǵam ekenimizdi kórsete bileıik.
Stanıslav Cherchesov – halyqaralyq deńgeıdegi tanymal fýtbolıst ári 20 jyldyq tájirıbesi bar kásibı jattyqtyrýshy. Sondyqtan ol túbinde qazaqstandyq jankúıerlerdiń senimin aqtap, ulttyq quramany qazirgi kúrdeli kezeńnen abyroımen alyp shyǵady dep senemin.
Bárimiz múddesi ortaq fýtbol janashyrlary retinde bir-birimizdi qoldap júreıik», delingen mınıstrdiń jazbasynda.
Buǵan deıin vedomostvo federasııalar mınıstrlikke baǵynysty bolyp tabylmaıtynyn aıtyp, degenmen ulttyq qundylyqtarǵa qurmetpen qaraý isine beı-jaı qaramaý kerek ekenin jetkizgen.
Al fýtbol federasııasy Stanıslav Cherchesovtiń qazaq tilin belsendi úırenip júrgenin jáne sol oqıǵada «ázildemek» bolǵanyn málimdegen.
