Almaty qalalyq Qoǵamdyq damý basqarmasynyń Memlekettik áleýmettik tapsyrysy negizinde «Janashyr» halyqaralyq qoǵamdyq qory júrgizip otyrǵan joba sheńberinde joǵary oqý oryndarynyń stýdentteri arasynda, sondaı-aq saýda núkteleri men mekemelerdegi tutynýshylar arasynda oqytý, úıretý dáristeri uıymdastyrylyp keledi.
Joba áleýmettik jelilerde «Tutynýshy – Potrebıtel» atty belsendi aqparattyq paraqshalary arqyly, oǵan saýda núktelerinde tutynýshylardyń quqyqtaryn qorǵaý salasyndaǵy jańa zańnama boıynsha keńes beretin mobıldi zań qyzmeti áreket etken.
«Joba aıasynda zańgerlerdiń qatysýymen mobıldi top Almatynyń barlyq aýdandaryndaǵy saýda oryndarynda 1 myńnan astam adamǵa keńes berdi. 1 myńnan astam stýdent joǵary oqý oryndary men kolledjderde qonaq dáristerine qatysty. Áleýmettik jelilerde 300-ge jýyq aqparattyq materıaldar ornalastyrylyp, metrolarda, ýnıversıtetter men medısına mekemeleri sııaqty jerlerde qazaq jáne orys tilderinde tutynýshylardyń quqyqtaryn qorǵaý boıynsha beınerolıkter kórsetildi. BAQ ókilderi úshin Departament basshylyǵynyń qatysýymen brıfıng ótkizildi. Azamattardyń tutynýshy retindegi quqyqtary týraly habardar bolý deńgeıin baǵalaý úshin shamamen 1,5 myń saýalnama júrgizildi. Bul taqyryp óte ózekti bolyp qala beredi jáne halyqtyń óz quqyqtary týraly bilim deńgeıin arttyrý úshin jumysty jalǵastyrý qajet», dedi joba jetekshisi, «Janashyr» halyqaralyq qoǵamdyq qorynyń prezıdenti Jańyl Ápetova.
Almaty qalasy Qoǵamdyq damý basqarmasy basshysynyń orynbasary Baǵdáýlet Sarıev bolashaqta osy jobany odan ári keńeıtý josparlanyp otyrǵanyn aıtady.
Sondaı-aq dóńgelek ústelde Almaty qalalyq Saýda jáne tutynýshylardyń quqyqtaryn qorǵaý departamenti basshysynyń orynbasary Nurlan Ábdıev mekeme jumysynyń 9 aıdaǵy jumysyna esep berip, azamattardan kelip túsken ótinishter týraly baıandady.
Almaty qalasy Memlekettik qyzmet isteri agenttigi departamentiniń basqarma basshysy Maqsat Janbyrshıev azamattar memlekettik qyzmetterdi alý kezinde olardyń quqyqtary buzylǵan jaǵdaıda olardyń vedomstvolaryna júgine alatynyn eske saldy.
Halyqaralyq quqyq qorǵaý ortalyǵynyń basshysy Jandilda Jaqypov tutynýshylardyń quqyqtaryn buzýshylyqtardy sotqa deıin retteý úshin medıasııalyq uıymdarǵa júginý qajettigin atap ótti. Elde júzden astam medıatorlyq uıymdar jumys isteıdi, biraq kóptegen tutynýshylar bul múmkindikti áli de bilmeıdi deıdi.
ALMATY
