Foto: Sý resýrstary jáne ırrıgasııa mınıstrligi
Kóp faktorly zertteý nysandardy qaýipsiz paıdalanýdy qamtamasyz etý jáne apattardyń aldyn alý úshin júrgiziledi. Búginde mınıstrlik mamandary «Qazsýshar» fılıaldary men jergilikti atqarýshy organdarǵa anyqtalǵan kemshilikterdi joıý, jóndeý, memleket menshigine qaıtarý jumystary boıynsha óz qorytyndylaryn berdi. Vedomstvo bıyl 63 gıdrotehnıkalyq qurylysta kóp faktorly zertteý júrgizgen.
Mınıstrlik jyl sońyna deıin taǵy 19 nysanda kóp faktordy zertteý júrgizýdi josparǵa alǵan. Aıta ketsek, jańa Sý kodeksiniń jobasyna sáıkes, elimizde gıdrotehnıkalyq nysandar ár 5 jyl saıyn kóp faktorly zertteýden ótýge mindetteledi.
«Mınıstrlik ázirlegen Sý sharýashylyǵyn damytýdyń keshendi josparyna sáıkes 2024-2028 jyldar aralyǵynda respýblıka boıynsha 557 nysanda kóp faktorly zertteý júrgizý josparlanyp otyr. Onyń ishinde, kelesi jyly 105 gıdrotehnıkalyq nysan tekseristen ótedi. Kóp faktorly zertteý qorytyndysy boıynsha kúrdeli jóndeýdi qajet etetin nysandardy qalpyna keltirý josparyn qabyldaý qajet. Atalǵan jumysty basseındik ınspeksııalar jergilikti atqarýshy organdarmen birlese oryndaýy tıis», dedi apparat keńesinde sala mınıstri Nurjan Nurjigitov.
