Foto: Úkimettiń baspasóz qyzmeti
Eki el prezıdentteri qol jetkizgen ekijaqty taýar aınalymyn arttyrý boıynsha ýaǵdalastyqtardyń júzege asyrylý barysyn qarady. Sonymen qatar ónerkásiptik kooperasııa, sý, energetıka, tranzıt jáne kólik, gaz salalaryndaǵy ózara is-qımyl máseleleri talqylandy.
Aıta keteıik, О́zbekstan Qazaqstannyń Ortalyq Azııa aımaǵyndaǵy negizgi saýda seriktesi sanalady. Bıylǵy segiz aıdyń qorytyndysy boıynsha eki el arasyndaǵy ózara saýda kólemi $2,5 mlrd quraǵan. Oljas Bektenov saýda-ekonomıkalyq yntymaqtastyqty damytýǵa jáne ózara ınvestısııa úshin qolaıly jaǵdaı jasaýǵa baǵyttalǵan sharalardy keńeıtý qajettigin atap ótti.
«Qazaqstan men О́zbekstannyń barlyq baǵytta birlesken jumysynyń keleshegi zor. Buǵan, eń aldymen, memleketter basshylary Qasym-Jomart Kemeluly Toqaev pen Shavkat Mıromonovıch Mırzııoev arasyndaǵy senimdi saıası dıalog yqpal etip otyr. Astanada ótken bıznes-forým aıasynda qol qoıylǵan $7 mlrd kólemindegi ınvestısııalyq kelisimder men kommersııalyq kelisimsharttar aıtarlyqtaı úles qosady. Búgingi kezdesý jańa iri jobalardy júzege asyrýdyń bastaýy bolyp, búkil Ortalyq Azııa aımaǵynyń turaqty ekonomıkalyq damýyna zor úles qosatynyna senimdimin», dedi Oljas Bektenov
Munaı-hımııa, metallýrgııa, avtomobıl, ındýstrıaldyq, azyq-túlik, hımııa jáne farmasevtıka salalarynda úlken eksporttyq áleýet bar. Qazaqstan О́zbekstanǵa jalpy qosylǵan quny joǵary elimizdiń taýarlarynyń 40 túri boıynsha quny $550 mln-nan asatyn eksporttyq jetkizilimder kólemin arttyrýǵa daıyn.
О́zbekstan Premer-mınıstri Abdýlla Arıpov búginde eki el arasyndaǵy qarym-qatynastyń basym baǵyty óńiraralyq yntymaqtastyqty damytý bolyp otyrǵanyn atap ótti.
«Sońǵy 7 jylda О́zbekstan men Qazaqstan arasyndaǵy ózara taýar aınalymy 2,5 esege jýyq ósip, ótken jyly $4,4 mlrd-qa jetti. Búginde О́zbekstanda qazaqstandyq kapıtaldyń qatysýymen 1 myńnan astam kásiporyn jumys isteıdi. Shekaralas óńirler bir-birimen – Qaraqalpaqstan Respýblıkasy Mańǵystaý oblysymen, Tashkent Túrkistan oblysymen, Naýaı Qyzylorda oblysymen tikeleı ári tyǵyz baılanys ornatqan. Bizdiń basqa aımaqtarymyz da baılanystardy dáıekti túrde nyǵaıtyp, saýda-sattyq jáne ónerkásiptik kooperasııany damytyp keledi. Bul rette áli iske asyrylmaǵan úlken áleýet bar», dedi Abdýlla Arıpov.
Sondaı-aq, forým barysynda ınvestısııa kólemi $3,4 mlrd-ty quraıtyn 74 birlesken jobany iske asyrýdy jáne 14,6 myń jumys ornyn qurýdy kózdeıtin ónerkásiptik kooperasııany damytýǵa erekshe nazar aýdaryldy. Onyń ishinde Qazaqstan aýmaǵynda 65 kásiporyn ashý josparlanýda, bul elimizde 13,6 myń jańa jumys ornyn qurýdy qamtamasyz etedi.
Búginde elimizde 9, О́zbekstanda taǵy 3 birlesken joba júzege asyrylǵan. Bul jalpy 4,8 myń jańa jumys ornyn ashýǵa múmkindik berdi. Qazaq-ózbek ónerkásiptik kooperasııasy yntymaqtastyǵyna mysal retinde Qostanaıdaǵy Chevrolet Onix avtomobılderiniń shaǵyn toraptyq óndirisin, Sarandaǵy turmystyq tehnıka shyǵaratyn zaýytty, Shymkent qalasyndaǵy jáne Túrkistan oblysyndaǵy tigin jáne jip ıirý-toqý fabrıkalary, Angrendegi avtoklavty gaz-beton óndirisi jáne basqa da óndiris oryndary jatady. «Ortalyq Azııa» halyqaralyq ónerkásiptik kooperasııa ortalyǵyn qurý eki el úkimetteriniń birlesken jumysyna jańa serpin bermek. Munda «bir tereze» qaǵıdaty boıynsha qyzmetter engizilip, kásipkerler úshin salyqtyq, kedendik jeńildikter men basqa da artyqshylyqtar qarastyrylǵan.
