Foto: film.ru
Aty da aıtyp turǵandaı, bul – «Venom» trılogııasynyń qorytyndy bólimi. Alǵashqy eki bólimi úlken qyzyǵýshylyq týdyrǵan.
«Sony Pictures kompanııasynda dýblıaj ben lokalızasııa árdaıym halyqaralyq marketıng strategııasynyń ajyramas bóligi bolatyn. Burynnan kele jatqan seriktesimiz, «Meloman» kompanııasymen birlesken jumysymyzdyń arqasynda, franshızanyń jańa bólimi «Venom: Sońǵy bı» týyndysynda Venom qazaq tilinde sóıleıtinine qýanyshtymyz», deıdi Sony Pictures kompanııasynyń halyqaralyq marketıng jónindegi vıse-prezıdenti Natalııa Grymova.
«Gollıvýd stýdııalary qazaq tiliniń damytýǵa belsendi úles qosyp jatqany biz úshin óte mańyzdy! Bıyl Qazaqstannyń úlken ekrandaryna jańa «Venom: Sońǵy bı» blokbasterin shyǵaramyz. Dybystalǵan fılmder tek kóńil kótermeıdi, sondaı-aq olardyń orasan zor tanymdyq áleýeti bar! Elestetip kórińizshi: súıikti sýperqaharmandar sizge jaqyndaı túsedi! Venomnyń ózi ana tilińizde sóıleıdi. Bul ǵajap qoı! Al stýdııalarǵa kórermenderdiń qazaq dýblıajyna degen súıispenshiligin kórsetip, kelesi jyly qazaq tilinde shyǵatyn dýblıajdar men ǵajaıyp shytyrman týyndylardy kútemiz», dep pikir bildirdi MARWIN/Meloman bas dırektory Vadım Golenko.
«Qazaq tiline aýdarylyp jatqan fılmderdi keńinen nasıhattap, kınoteatrlarǵa baryp, qazaq dýblıajyn qoldaýǵa shaqyramyz. Álemdik stýdııalardyń qazaqtildi ortanyń qyzyǵýshylyǵyn eskerip, týyndylaryn óz esebinen aýdaryp, usynýy – biz úshin óte jaqsy jańalyq. Bıylǵy álemdik premeralardyń qazaq tilindegi aýdarmasy buryn-sońdy bolmaǵan rekordtyq kórsetkishterge jetti. Qazaqsha kıno qaraýǵa yqylasty qaýymnyń kóbeıgeni anyq baıqaldy. Aldaǵy ýaqytta tanymal týyndylardy qazaq tiline aýdarý dástúri jalǵasa beredi. Bul tilimizdiń ásirese balalar men jastar úshin tartymdylyǵyn arttyrýǵa jáne keńinen taratýǵa baǵyttalǵan tıimdi tásil dep sanaımyn», deıdi Halyqaralyq «Qazaq tili» qoǵamynyń prezıdenti Raýan Kenjehanuly.
Qazaq tilindegi dýblıajdy otandyq Movie Dalen dýblıaj stýdııasy jasady.
Halyqaralyq «Qazaq tili» qoǵamynyń baspasóz qyzmetiniń málimdeýinshe buǵan deıin Disney, Pixar syndy halyqaralyq stýdııalar álemdik tanymal týyndylaryn óz esebinen qazaq tiline aýdaryp, kásibı dýblıaj jasady. «Oıjumbaq 2» fılmi alǵashqy 4 kúnde 40 000 000 teńgeden astam qarajat jınap, buǵan deıin kórsetilgen týyndylar arasynda rekord ornatty. Qyrǵyzstan, Armenııa, Grýzııa, Ázerbaıjan, О́zbekstan, Tájikstan elderi arasynda Qazaqstan jınalǵan soma boıynsha birinshi orynda turdy.
Aıta ketsek, «Venom: Sońǵy bı» fılminde Tom Hardı Venom rólinde oralady. Trılogııanyń sońǵy bóliminde Eddı men Venom qashýǵa májbúr bolady. Dushpandary Jerde de, basqa álemderde de qyr-sońdarynan qalar emes. Jaýlar sheńberi tarylǵandyqtan, olar taǵdyr ózgertetin sheshim qabyldaýy kerek. Bul olardyń sońǵy bıi bolýy múmkin.
Rejıssıor: Kellı Marsel.
Basty rólderde: Tom Hardı, Chıvetel Edjıofor, Djýno Templ, Rıs Ivans, Peggı Lý, Alanna Iýbak, Stıven Grem.
