Foto: azattyq-ruhy.kz
Astanada úshinshi jyl qatarynan «Meniń elim – meniń týym» aksııasy ótip jatyr, ol QR Memlekettik Týyn nasıhattaýǵa baǵyttalǵan. Ulttyq mereke – Respýblıka kúni qarsańynda elorda jastary «Meniń elim – meniń týym!» chellendjin qoldady.
Merekege oraı jastar osyndaı erekshe aksııa uıymdastyryp, úılerdiń balkondaryna 1000-ǵa jýyq tý ildi.
Elorda jastary bastaǵan aksııany elimizge tanymal sportshylar da qoldap, biri óz balkondaryna tý ilse, endi biri ánurandy shyrqady. Olardyń qatarynda MMA sport túrlerinen Astana qalasynyń aǵa jattyqtyrýshysy Nurlan Qarabalın men bokstan jastar arasynda Azııanyń eki dúrkin jáne 22 jasqa deıingi Azııa chempıonatynyń jeńimpazy Temirlan Muqataev bar.
«Mundaı bastamalar jastar arasynda patrıotızmdi nyǵaıtyp, ulttyq qundylyqtardy dáripteıdi. Sport arqyly biz ózimizdiń kúshimizdi ǵana emes, rýhanı baılyǵymyzdy da kórsetemiz. Árbir jetistik – elimiz úshin maqtanysh, sondyqtan biz óz jetistikterimizben Otanymyzdy odan ári damytýǵa úles qosýymyz kerek», dedi aýyr salmaqtaǵy boks sheberi Temirlan Muqataev.
Sondaı-aq aýyr atletıkadan jastar jáne jasóspirimder arasynda álem chempıonatynyń úsh dúrkin chempıony elordalyq Edige Emberdi Respýblıka kúni qarsańynda Memlekettik Gımndi oryndap, áleýmettik jelige júktedi.
