Foto: Májilistiń baspasóz qyzmeti
Palata tóraǵasy jınalǵandardy aıtýly merekemen quttyqtap, Respýblıka kúniniń mán-mańyzyna erekshe nazar aýdardy.
«Táýelsizdiktiń sımvoly bolyp qana qoımaı, Prezıdentimiz Qasym-Jomart Toqaevtyń bastamasymen osy mereıli data qaıta túlep, memleket damýyndaǵy jańa dáýirdiń bastaýyna aınaldy. Respýblıka kúni el kúntizbesinen oıyp turyp oryn aldy deýge bolady. Bul – memleketimizde júrgizilip jatqan saıası reformalardyń naqty nátıjesi. Bizdiń endigi maqsatymyz – basty qundylyǵymyz – táýelsizdigimizdi kózdiń qarashyǵyndaı qorǵaý, ony nyǵaıtý. Memleket basshysy qandaı bastamany qolǵa alsa da, osy buljymas qaǵıdadan aınyǵan emes», dedi Erlan Qoshanov.
Májilis spıkeri qazirgi zań shyǵarý qyzmetine toqtalyp, depýtattar Prezıdent reformalaryn iske asyrýda úlken jumys atqaryp otyrǵanyn atap ótti.
«Biz árdaıym «Halyq únine qulaq asatyn memleket» tujyrymdamasyn basshylyqqa alamyz. Halyqtyń únin estip qana qoımaı, azamattardy tolǵandyratyn problemalardy bilemiz. Zań shyǵarý arqyly olardyń sheshilýine atsalysamyz. Sondyqtan Memleket basshysy Máslıhat depýtattarynyń forýmynda «Únemi syndarly pikirtalas ótip, naqty sheshimder ázirlenetin Májilisten úlgi alý kerek» degen bolatyn. Bul – Prezıdenttiń bizdiń qyzmetimizge bergen joǵary baǵasy. Aldaǵy ýaqytta da osy qarqyndy báseńdetpeýimiz kerek», dedi Palata tóraǵasy.
Mereke qarsańynda birqatar depýtat pen Májilis apparatynyń qyzmetkerlerine memlekettik nagradalar berildi.
Memleket basshysynyń Jarlyǵymen I dárejeli «Barys» ordeni V shaqyrylymdaǵy Parlament Májilisiniń tóraǵasy Qabıbolla Jaqypovqa tabystalsa, «Parasat» ordenimen Májilis depýtattary Bolatbek Najmetdınuly, Marat Bashımov, Berik Beısenǵalıev jáne Qudaıbergen Beksultanov marapattaldy.
Al «Qurmet» ordeni Májilis depýtattary Jıgýlı Daırabaevqa, Erkin Ábilge, Ashat Rahymjanovqa, Ekaterına Smyshlıaevaǵa, Aına Mysyrálimovaǵa jáne Májilis Apparaty basshysynyń orynbasary Indıra Mamasheva men Májilis Apparatynyń bólim meńgerýshisi Patıma Qııasbaevaǵa berildi.
«Eren eńbegi úshin» medali Májilis depýtattary Kenjeǵul Seıtjanǵa, Nurgúl Taýǵa, Danııar Qasqaraýovqa jáne Májilis Apparatynyń bólim meńgerýshisi Janna Turymbaeva men bólim meńgerýshisiniń orynbasary Sáýle Bapaqovaǵa tabys etildi.
Sonymen qatar Erlan Qoshanov TMD-ǵa múshe memleketter Parlamentaralyq Assambleıasynyń medalimen Májilis Apparaty basshysynyń orynbasary Jasulan Júginisovti, TMD-ǵa múshe memleketter Parlamentaralyq Assambleıasynyń Qurmet gramotasymen Májilis depýtattary Magerram Magerramov pen Iýlııa Kýchınskaıany marapattasa, TMD-ǵa múshe memleketter Parlamentaralyq Assambleıasynyń Qurmet belgisin Májilis depýtaty Elnur Beısenbaevqa jáne UQShU Parlamenttik Assambleıasynyń Qurmet gramotasyn Májilistiń Baspasóz qyzmetiniń meńgerýshisi Muhtar Ibraımovqa tabystady.
Sonymen qatar saltanatty jıynda Májilis tóraǵasynyń Alǵys hattary berildi.
